Koreıa dárigerleri Shymkentte 150 keli salmaqtaǵy emdelýshige kúrdeli ota jasady
ShYMKENT. QazAqparat - Shymkenttik hırýrgter semizdikpen kúresýge kómektesedi. Oblystyq klınıkalyq aýrýhana bazasynda emdelýshiniń asqazanyn kishireıtý boıynsha kúrdeli ota jasaldy, dep habarlaıdy «QazAqparat» HAA otyrar.kz-ke silteme jasap.
Jergilikti mamandarǵa kómek kórsetýge Ońtústik Koreıa hırýrgteri keldi. Ota ústelinde naýqastyń salmaǵy 150 keli boldy. Dárigerler oǵan joǵary deńgeıli semizdik degen dıagnoz qoıdy.
Hırýrg Iongjın Kımniń aıtýynsha, «semizdik máselesi búgingi tańda álem boıynsha keń taralyp otyr».
«Ókinishke oraı mundaı emdelýshiler arasynda jastar óte kóp. Máseleni joıý úshin bul iske hırýrgterdiń aralasýyna týra keledi. Mundaı otalar shet elderde jıi jasalady. Qazaqstan men TMD elderinde bul sala endi ǵana damyp keledi. Sizderdiń dárigerlerińizben arada jasalǵan memorandým aıasynda biz sheberlik synyptaryn ótkizemiz», - dedi ol. Oblystyq densaýlyq saqtaý basqarmasy men ońtústikkoreılik Sýnhonchıan klınıkasy eki jaqty kelisimshart aıasynda ońtústikqazaqstandyq hırýrgterdiń biliktilikterin arttyrady.
Otadan ózge sheteldik dárigerler oblystyq klınıkalyq aýrýhana bazasynda basqa da medıtsınalyq trenıngter ótkizdi. Sondaı-aq, OQO mamandary Ońtústik Koreıada bolyp, sheteldik mamandardyń jumysymen tanysyp, tájirıbe almasty.
