Koreı dıasporasynyń Qıyr Shyǵystan Almaty oblysyna kúshtep kóshirilgenine – 85 jyl
Alǵys aıtý kúninde dástúr boıynsha jetisýlyq koreıler men ózge ult ókilderi Bastóbe aýyly mańyndaǵy «Qazaq halqyna myń alǵys» monýmenti janynda saltanatty jıyn ótkizip, ystyq yqylastaryn bildirdi. 1937 jyldyń qara sýyǵynda júzdegen koreı otbasyn dál osy Bastóbege ákelip, aıdalaǵa túsirip ketken. Ash-jalańash halyq taý eteginen jerkepe qazyp panalaýǵa májbúr bolǵan. Alaıda jergilikti qazaq aýyldary olardy úıine ákelip, bólmeniń bir shetine ornalastyryp, bir úzim nanyn bóliskenin qazirgi urpaq umytpaıdy, umytpaq emes. Búginde oblysta koreı ultynyń 16 myńnan astam ókili turady. Bul sol kezdegi jergilikti halyqtyń qonaqjaı-baýyrmaldylyǵynyń tátti jemisi dep biledi.
«Qazaq halqyna myń alǵys! Men osy alǵys aıtý kúninde barsha qazaq halqyna rahmetimdi aıtqym keledi. Ózim osy jerde turyp jatqan koreılerdiń úshinshi býyn urpaǵymyn. Bizdiń balalarymyz ben nemerelerimiz de osy jerde bilim alyp, ósip-ónip, eńbek etýde. Qazaq eli sol kezde óziniń qıyn jaǵdaıyna qaramastan bizdi jáne kóptegen ózge ult ókilderin baýyryna basty. Biz bul jaqsylyqty eshqashan umytpaımyz»,- dedi Qaratal aýdandyq Koreı aqsaqaldar alqasynyń tóraǵasy Vıktor Pak.
