Kórermensiz ótken premera: Melanııa Tramp týraly fılm sátsizdikke ushyrady
ASTANA. KAZINFORM — Amazon úlken úmit artqan, daýly ári kommertsııalyq turǵyda tabysty bolady dep josparlanǵan Melanııa Tramp týraly derekti fılm prokatta tómen nátıje kórsetti, dep habarlaıdy BILD basylymy.
Aýqymdy jarnama naýqanyna jáne qomaqty ınvestıtsııalarǵa qaramastan, fılm kútilgen kórermen sanyn tarta almady.
Fılmniń prokaty qańtardyń sońǵy kúnderinde bastaldy, alaıda alǵashqy demalys kúnderiniń ózinde-aq kórermen tarapynan aıtarlyqtaı qyzyǵýshylyq baıqalmady. Birqatar BAQ derekterine sáıkes, Amazon fılmniń óndirisine, marketıngine jáne kınoprokatyna shamamen 75 mıllıon AQSh dollaryn jumsaǵan. Alǵashqy ýık-endte fılm AQSh-ta 1 778 kınoteatrda kórsetilip, bar-joǵy 7,04 mıllıon dollar jınady.
Soǵan qaramastan Amazon MGM kompanııasy prokattyń bastalýyn sátti dep baǵalap, bul kórsetkish sońǵy 10 jyldaǵy kontserttik fılmderdi eseptemegende eń iri derekti fılmdik start bolǵanyn atap ótti. Alaıda kınoındýstrııa ókilderi men salalyq basylymdar bul pikirmen kelispeıdi.
Business Insider basylymynyń málimetinshe, joba kompanııaǵa qazirdiń ózinde shyǵyn ákelgen. Al The Guardian gazetiniń baǵalaýynsha, fılm ózin-ózi aqtaýy úshin álemdik prokatta shamamen 100 mıllıon dollar jınaýy qajet.
Halyqaralyq naryqtarda da kartına álsiz nátıje kórsetip otyr. Ulybrıtanııada fılm prokat reıtınginde 29-orynǵa turaqtap, 155 kınoteatrda barlyǵy 32 974 fýnt sterlıng jınaǵan. Aýstralııada fılm tek 31-orynnan bastady. Kóptegen seanstardyń derlik bos zaldarda ótkendigi habarlandy.
The Guardian dereginshe, fılm kommertsııalyq úmitti aqtamady. Bul jaǵdaı premera qarsańynda Donald Tramptyń anshlag bolady dep boljaǵan málimdemelerine qaramastan bolyp otyr.
Buǵan deıin Aq úıde fılmniń jabyq kórsetilimi ótkendigi habarlanǵan edi. Jobanyń prodıýseri Mark Bekmannyń aıtýynsha, bul fılm saıası baǵytta emes — shyǵarmashylyq tujyrymdamasyn birinshi hanymnyń ózi jeke baqylaýda ustaǵan. Lentada onyń stıli, dıplomatııalyq qyzmeti, qaýipsizdik máseleleri kórinis tapqan, sondaı-aq prezıdenttiń ázilqoı qyryn kórsetetin epızodtar da bar.
