Kórermendi jylatý ońaı, kúldirý qıyn - Maıra Muhamedqyzy
ALMATY. QazAqparat - Meniń bala kezimdegi armanym oryndaldy. Erteń Almatyda ótetin «Aısulý» komedııalyq operasynda basty róldi somdaıtyn Maıra Muhamedqyzy osylaı dedi.
«Kórermendi jylatý ońaı, kúldirý qıyn. Men úshin komedııalyq róldi somdaý óte qıynǵa soqty. Biraq barynsha tyrysyp jatyrmyn. Baǵasyn erteń bere jatarsyzdar», - dedi ol. Onyń aıtýynsha, Aısulýdyń boıynda barsha qazaq qyzdaryna tán uıańdyq, náziktik, tazalyq qasıetteri jınaqtalǵan.
Sonymen qatar, ánshi óziniń bala kezdegi armanynyń oryndalǵanyn aıtady.
«Týyndy sıýjetinde basty keıipker Aısulý sulýlyq baıqaýyna qatysyp, jeńimpaz atanady. Men bala kezimnen sulýlyq baıqaýyna qatyssam degen armanym bolatyn. Endi sahnada bolsa da meniń armanym oryndalatyn boldy», - dedi Maıra Muhamedqyzy.
Esterińizge sala keteıik, erteń Almatyda Abaı atyndaǵy memlekettik akademııalyq opera jáne balet teatrynda qazaqtyń alǵashqy komedııalyq «Aısulý» operasynyń premerasy ótedi.
Bul mádenı shara qazaqtyń qarymdy kompozıtory Sydyq Muhamedjanovtyń týǵanyna 90 jyl tolýyna, Abaı atyndaǵy memlekettik akademııalyq opera jáne balet teatrynyń qurylǵanyna 80 jyl tolýyna oraı uıymdastyrylyp otyr. Eń alǵash ret bul opera 1964 jyly Almatyda qoıylǵan. Ol kezde týyndyny belgili rejısser Káýken Kenjetaev sahnalaǵan bolatyn.
Al, týyndydaǵy basty obrazdar - Serke rólin Ermek Serkebaev, Aısulýdy Roza Jamanova somdap shyqqan edi.
