Kórermendermen qaýyshý - ártister úshin úlken baqyt - Asanáli Áshimov
ORAL. QazAqparat - Kórermendermen qaýyshý - ártister úshin úlken baqyt. Bul týraly Qazaqstannyń Eńbek Eri, KSRO halyq ártisi, Memlekettik syılyqtardyń ıegeri Asanáli Áshimov aıtty, dep habarlaıdy QazAqparat tilshisi.
M.Áýezov atyndaǵy Qazaq memlekettik akademııalyq drama teatrynyń Batys Qazaqstan oblysyndaǵy gastroline oraı Oralǵa arnaıy kelgen osy óner ujymynyń kórkemdik jetekshisi Asanáli Áshimovtiń atap ótkenindeı, Aq Jaıyq óńiri - talaı ulylardyń kindik qany tamǵan kıeli ólke.
«Bizdiń teatr osyndaı qasıetti topyraqta bir apta gastrolmen boldy. Bul, árıne, az. Bir aı bolsa da, artyq etpes edi. Men árdaıym jýrnalıster qoıǵan saýalǵa halyq ártisimen, ár ýaqytta halyqpen birgemin dep aıtamyn. Óıtkeni qaı ónerdiń de basty tóreshisi - halyq. Halyq aıtsa, qalt aıtpaıdy. Bárin de baǵalaıtyn halyq. Ártisterdiń eki ómiri bar. Biri - kúndelikti ómir. Ekinshisi - sahna. Adamdardyń jasyna jas qosyp, ǵumyryn da uzartatyn osy teatr. Men, mine, 81 jasqa keldim. Kórermenderimmen qoshtasqym kelmeıdi, áli talaı kezdesemiz. Osy saparymyzda bizdi oblys ákimi Altaı Kólginov qabyldap, teatr ujymyna rızashylyǵyn bildirdi. Ónerdi árdaıym qoldaýymyz kerek. Muhtar Áýezov aıtqanyndaı, halyqty ósiretin de, óshiretin de - óner», dedi A.Áshimov.
H.Bókeeva atyndaǵy Batys Qazaqstan oblystyq qazaq drama teatrynda M.Áýezov atyndaǵy teatr senbi kúni qoıǵan «Tańsulý» dramasy (avtory Ǵarıfolla Esim, rejısseri Alma Kákisheva) aldynda sondaı-aq BQO ákiminiń orynbasary Ǵabıdolla Ospanqulov sóz alyp, teatr dırektory Ashat Maemırovke óńir basshysynyń atynan alǵyshat tabys etti.
Teatr dırektory, Qazaqstannyń eńbek sińirgen qaıratkeri A.Maemırov «Rýhanı jańǵyrý» baǵdarlamasy aıasynda teatr gastroli óńirlerde budan bylaı da jalǵasatynyn jetkizdi. Sonymen qatar teatr Frantsııada ótetin dúnıejúzilik «Avenıý» teatr festıvaline Qazaqstannan alǵash ret qatysaıyn dep otyr. Oǵan teatr aqyn-dramatýrg, Memlekettik syılyqtyń ıegeri Iran-Ǵaıyptyń (Iranbek Orazbaev) «Qorqyt» dramasyn ázirleýde.
Aıta keteıik, M.Áýezovtiń Oraldaǵy gastroli 13 mamyr kúni jazýshy-dramatýrg Rahymjan Otarbaevtyń «Beıbarys sultan» tarıhı dramasymen (rejısseri ıÝrıı Hanınga-Beknazar) túıindeledi. Odan keıin Arqalyq qalasyna attanady.
