Kórermender nazaryna: osy aptadaǵy basty kınopremeralar
ASTANA. KAZINFORM — Bul apta kınoteatrlar merekelik kóńil-kúıge toly. Janrlardy toǵystyrǵan apta kınopremeralaryn Kazinform tilshisiniń sholýynan bile alasyzdar.
JAŃA ENE (Novaıa teşa) 5.0⭐
Janry: Komedııa
Uzaqtyǵy: 96 mınýt
El: Reseı, 2026
Rejısser: Asqar Uzabaev
Vıktor Sýslov taǵy da otbasy arasyndaǵy tartystyń ortasynda qalady. Bul joly ol jańa qaıyn enesiniń qas-qabaǵyna qarap, onyń qatal minezine kónýge májbúr. Onsyz da berekesi ketip turǵan shańyraqqa Vıktordyń egiz baýyry Toha kelip, tynyshtyqty múlde qashyrdy. Úı ishindegi álgi «jalǵan jarasym» kóp uzamaı byt-shyt bolady. Qaıyn eneniń de túrtki bolýymen eki baýyrdyń baıaǵydan beri basylmaı kele jatqan kıkiljińi qaıta tutanyp, jaǵdaı odan ári ýshyǵa túsedi. Al dál osy kezde Tohany izdep kelgen RJFQ qyzmetkerleri esik qaǵyp, onsyz da shıelenisip turǵan ahýaldy tipti kúrdelendirip jiberedi.
Ol sen emes 8.7⭐
Janry: Komedııa
Uzaqtyǵy: 87 mınýt
El: Kazahstan, 2026
Rejısser: Azıza Mansurova
«Ol sen emes» – aýyl ómirin shynaıy ári kúlkili etip kórsetetin komedııa. Nursultan – qasapshy, biraq jumsaq minezdi, ózgege joq dep aıta almaıtyn qarapaıym jigit. Áıeli Aqerke – pysyq, tik minezdi, eshteńeden qaımyqpaıtyn áıel. Tirliktiń aýyrtpalyǵy men usaq-túıek urystar olardyń qarym-qatynasyn kúnnen-kúnge ýshyqtyrady. Bir keshte qatty janjaldan keıin ekeýi tósekte únsiz uıyqtap qalady. Tańerteń oıanǵanda kútpegen jaǵdaı bolady – jandary aýysyp ketken. Endi Nursultan – áıeldiń táninde, Aqerke – erkektiń denesinde. Osydan bastap kúlkili ári yńǵaısyz jaǵdaılar bastalady: Aqerke qasapshy bolyp, mal soıýǵa májbúr bolsa, Nursultan sábı baǵyp, enesimen til tabysýǵa tyrysady. Árqaısysy ekinshisiniń ornynda júrip, buryn baıqamaǵan qıyndyqtardy kóredi. Alǵashynda bul – haos pen abyroısyzdyqqa aınalsa, ýaqyt óte kele olar bir-biriniń eńbegin, sabyryn, jan dúnıesin túsine bastaıdy. Sonyń arqasynda qarym-qatynastary jańa deńgeıge kóteriledi. «Ol sen emes» – kúlkige toly oqıǵalardyń ortasynda mahabbattyń, túsinistiktiń jáne otbasylyq berekeniń qunyn kórsetetin júrekke jyly komedııa.
ANA (Mama) 9.0⭐
Janry: Drama
Uzaqtyǵy: 97 mınýt
El: Kazahstan, 2026
Rejısser: Aıbek Nyǵmet
Jazasyn ótep, bostandyqqa shyqqan Temir ómirin jańadan bastaýǵa bel býady. Biraq ótkenniń izi óshpeıdi: «umyttym» degen kúná kóleńkeńdeı sońynan qalmaıdy. Taǵdyr ony eń aýyr synaqpen betpe-bet ákeledi – dementsııaǵa shaldyqqan anasy. Bul – qatelik pen keshirim, paryz ben ar arasyndaǵy tartys týraly drama. Ótkeni men búgini toǵysqan sátte adam óz kóleńkesinen qashyp qutyla ala ma? Temirdiń tańdaýy sizdi de beıjaı qaldyrmaıdy.
QYZǴALDAQTAR (Tıýlpany) 1.0⭐
Janry: Komedııa, Melodrama
Uzaqtyǵy: 88 mınýt
El: Reseı, 2026
Rejısser: Anna Kýznetsova, ıÝlııa Lysova, ıÝlııa Ýzkıh
8 naýryz degen ne? Bul – kóktem, kún shýaǵy, qyzǵaldaqtar, anańnyń kúlkisi, mahabbatty seziný men baqyt. Sondaı-aq – áýre-sarsań, quttyqtaýlar, dúkendegi kezek, gúlder, bitpeıtin syılyq izdeý ábigeri. Jyl saıyn barsha áıelderge arnalǵan osyndaı dúnıejúzilik kúızelis bolatyndaı. Qarapaıym adamdar erekshe oqıǵalarǵa tap bolady, josparlanbaǵan kezdesýler ómirdi túbegeıli ózgertedi.
SEKІRGІShTER (Prygýny) 8.4⭐
Janry: Shytyrman oqıǵa, Komedııa, Mýltfılm, Otbasylyq, Ǵajaıyp
Uzaqtyǵy: 105 mınýt
El: AQSh, 2026
Rejısser: Denıel Chong
Ǵalymdar adam sanasyn shynaıy robot-janýarlardyń denesine ýaqytsha aýystyrýǵa múmkindik beretin jańa tehnologııany oılap tapty. Osy tásildiń arqasynda adamdar janýarlardyń álemin olardyń kózimen kórip, tirshiligin jaqynnan sezine alady. Bul jańalyq adamdar men janýarlar arasyndaǵy baılanysty múlde jańa deńgeıge kóterýi múmkin. Endi adam janýarlardyń minez-qulqyn, qorshaǵan ortasyn jáne ómir saltyn burynǵydan áldeqaıda jaqsy túsine alady. Osy tehnologııany qoldanǵan Meıbl janýarlar áleminiń talaı qupııasyn asha bastaıdy. Ol kórgenderi men bilgenderi onyń burynǵy túsiniginen áldeqaıda asyp túsedi.
ÁDEPSІZ USYNYS (Neprıstoınoe predlojenıe) 4.0⭐
Janry: Drama
Uzaqtyǵy: 103 mınýt
El: Ispanııa, 2026
Rejısser: Polo Menargız
Baı áýlettiń aqshadan taryqqan daryndy vıolonchelıst qyzy otbasyn qıyn jaǵdaıdan shyǵarýdyń jolyn izdeıdi. Onyń eń jaqyn qurbysynyń yqpaldy ákesi kómektesýge usynys jasaǵan kezde, qyz múmkin emes tańdaý aldynda qalady.
HAMNET: GAMLETKE ShABYT BERGEN OQIǴA (Hamnet: Istorııa, vdohnovıvshaıa Gamleta) 9.6⭐
Janry: Ómirbaıan, Drama
Uzaqtyǵy: 125 mınýt
El: Ulybrıtanııa, AQSh, 2026
Rejısser: Hloıa Chjao
Hamnet oba aýrýynan qaıtys bolǵan soń, onyń qos uly Agnes pen Ýılıam Shekspır XVI ǵasyrdaǵy Anglııada aýyr qasiretti bastan keshiredi. Balalarymen Stratfordta qalǵan Agnes ómirin jalǵastyrý úshin kúsh tabýǵa tyrysady, al Ýılıam Londonǵa attanyp, júrektegi qaıǵysyn óziniń uly shyǵarmalarynyń birin jazýǵa túrtki etedi.
BÓTEN (Postoronnıı) 7.6⭐
Janry: Krımınal, Drama
Uzaqtyǵy: 122 mınýt
El: Frantsııa, 2025
Rejısser: Fransýa Ozon
Aljır, 1938 jyl. Symbatty ári baısaldy jas jigit Merso anasynyń jerleý rásimine qatysady, biraq eshbir sezimin bildirmeıdi. Kúndelikti tirshiligine oralǵan ol keýdesindegi qýysty sezip, zerige bastaıdy, ári Marımen qarym-qatynasta bolýǵa májbúr bolady. Barlyǵy mánsiz kórinse de, jaǵajaıdaǵy qatty ystyq bir kúnde Merso men onyń aınalasyndaǵylardyń ómirin túbegeıli ózgertetin kútpegen oqıǵa bolady.
QALYŃDYQ! (Nevesta!) 8.6⭐
Janry: Drama, Melodrama, Horror, Ǵajaıyp
Uzaqtyǵy: 126 mınýt
El: AQSh, 2026
Rejısser: Meggı Djıllenhol
Chıkago, 1930 jyldar. Frankenshteınniń qubyjyǵy doktor Evfronııdiń serigi bolǵysy keledi. Olar birge bir qyzdy – Frankenshteınniń qalyńdyǵyn – tiriltedi. Ol óte tez damyp, olardyń úmitinen asyp ketedi. Qyzdyń tiri bolýy romantıkalyq oqıǵalarǵa, polıtsııanyń qyzyǵýshylyǵyna jáne kútpegen áleýmettik ózgeristerge jol ashady.
ÓZІNE JUMSAQ BOL (K sebe nejno) 6.0⭐
Janry: Melodrama, Komedııa
Uzaqtyǵy: 103 mınýt
El: Reseı, 2026
Rejısser: Ivan Kıtaev
Nadıa – mansap jolynda edáýir jetistikke jetken otolarıngolog-hırýrg, alaıda 40 jasqa taıaǵan shaǵynda kenet ózi jaıly eshteńe bilmeıtinin túsinedi. Jumysynda qudaıdyń qutty kúni naýqastarynyń seziný aǵzalaryn zerttese de, óz sezimderin múlde umytyp qalypty, bálkim eshqashan sezbegen de shyǵar. Kúıeýi Borıs kúndelikti kúıbeń tirshilikke shydamaı, ony eki jyl buryn tastap ketken. Degenmen ekeýi áli ajyraspady. Nadıa Olıvııa esimdi qyzyn tárbıelep, áli enesiniń páterinde turyp jatyr. Nadıaǵa álem mahabbatqa toly ekenin kórý úshin ózgerister kerek. Onyń ómirinde «náziktiktiń alty sabaǵy» paıda bolady, onyń árbiri ózin tanýǵa, daýysyn shyǵaryp, jańa úmit uıalatýǵa kómektesýge tıis.
MAHABBAT KІNÁLІ (Vınovata lıýbov) 8.2⭐
Janry: Melodrama, Komedııa
Uzaqtyǵy: 101 mınýt
El: Kanada, 2024
Rejısser: Joze Lorenso
Torontodaǵy sapary kezinde Verter esimdi ańǵal ári tartymdy jas jazýshy ómirindegi mahabbatyn kezdestiredi. Alaıda ol boıjetkenniń basqa bireýge ýáde bergenin biledi. Jaqyn dosy gıpohondrık bolsa da, ony kóndirýge tyrysady. Biraq Verter júregin jaýlap alý úshin óz ómirin túbegeıli ózgertedi. Ol keıde kúlkili, keıde qatelikterge toly áreketter jasaıdy, biraq bári shynaıy sezimnen týyndaıdy.
Ótken aptadaǵy kınopremeralar tizimin osy jerden kóre alasyzdar.