Kórermender qazaq juldyzdary efırde eshkiniń emshegin emgenine qarsy

Solardyń biriniń pikirin «Aıqyn» gazeti búgin jaryq kórgen sanynda basyp shyǵardy. «Basqasy basqa, endi «Fobııanyń» qatysýshylary eshkiniń emshegin ememiz dep jar salyp jatyr. Bizder bolsaq (kó­rermender) osy jasqa kelgende bala­la­rymyzdyń aldynda uıatqa qalatyn túri­miz bar. Bul degenińiz shoý! Aqsha, ataq, jańa tanystar... Joq degende, halyq kóshede kórgen boıda «mynaý álgi eshki­niń emshegin sorǵan ánshi» dep jazbaı ta­­nıtyn bolady. Ilham Ibragım degen balanyń qaıta «Іlmegi» (jańalyqtar) ájeptáýir kórýge keletin-di. Telmirip otyryp qaraıtynbyz. Endi ol da joq... «Fobııada» basqa da erekshe oılardy iske asyryp, keremet dúnıeler jasaýǵa bolmas pa?», - dep jazylǵan onda.

Basylymnyń osy sanynda baǵdarlamanyń júrgizýshisi Ilham Ibragımmen bolǵan suhbat ta (avtory - Áıgerim Baqytqyzy) berildi. Onda júrgizýshi «Eshkini emip, er-azamattardyń oryndy, orynsyz daýystap aıqaılaýy efırdiń etıkasyna qanshalyqty saı?» degen suraqqa kelesideı jaýap qaıyrady: «Iá, shyn máninde, "Fobııa" realıtı shoýy ınternetti burqyratyp jiberdi. Bul az ǵana ýaqyttyń ishinde jobanyń tanylyp úlgergenin kórsetse kerek. Olaı deıtinim, «Fobııanyń» efırge shyqqanyna áli bir aı da bolǵan joq. Biraq aıtylyp jatqan pikirler óte kóp. Árıne, pikir bolǵan soń, ol tek maqtaý nemese tek dattaý bolmaıdy. Biraq sizdiń synı pikirlerge kózqarasymdy bilgińiz kelip turǵany anyq. Olaı bolsa aıtaıyn. Qol qýsyryp otyrmaı, eńbek­tengen adam ǵana synǵa ushyraıdy. Eger bizge syn aıtylyp jatsa, onda eńbegimizdiń kózge kóringeni. Qandaı pikir aıtylsa da, bul televızııa salasy ókilderi úshin saf altynnan da qymbat. Qatysýshylardyń oryndy, orynsyz aıqaılaýy dep qaldyńyz jańa. «Orynsyz» degen sózben men ke­lis­pes edim. Óıtkeni shoýdyń qatysýshylary qan­daı synnan ótetini týraly bilmeıdi. Shyǵarmashylyq top bárin de jasyryn ustaıdy. Túri-turpaıy jándikterdi alǵash kórgen kezde siz qandaı kúıde bolar edińiz? Shoshyp, qorqatynyńyz belgili ǵoı. Ja­syratyn túgi joq, men de áý basta «keı qatysýshylarymyz asyra siltep jatqan bolar» dep oıladym. Óıtkeni «olar ustaǵan jylandy men de ustaımyn, onda turǵan túk joq» degen oı keldi. Biraq men de qaty­sýshylardyń rólinde bolyp, túsirilimge túser kezde, basqa bireý jylandy ákelip moınyma ilip qoıǵanda denem túrshigip, ne isterimdi bilmeı qaldym. Qoryqqan sátte shynaıy emotsııa shyǵady. Óıtkeni jal­maýyzǵa da jan kerek. Qansha jerden shaq­paıdy, tistemeıdi degenmen, ishki túı­sigiń oǵan senbeıdi eken».

Suhbat barysynda I.Ibragım ekranǵa taıaýda ǵana shyqqan shoý buǵan deıin otandyq telearnalarda kórsetilgen shoýlar jetpegen reıtıngge jetti degendi aıtty.

"Batysqa eliktegen túgimiz joq. Ba­rynsha qazaqy mentalıtetke saı etip, sharıǵat talaptaryn buzbaýǵa tyrysyp-baǵýdamyz. Bir nárseni aıtaıyn, ár tap­syrmany oılastyrý barysynda bizdiń prodıýserimiz birinshi kezekte ımamdar keńesine júginedi. Din ókilderi «bolady» dese, biz ony júzege asyramyz. Eger «bul haram tirlik» dese, birden toqtaty­lady. ıAǵnı «oıbaı-aý, jat dúnıeni en­gi­zip sana­ny ýlap jatyr, eliktep jatyr, úıtip jatyr, búıtip jatyr» dep baıbalam salý­ǵa negiz joq. Synı pikir aıtatyn kó­rer­mender "Fobııany" kórmese, jobada ne bolyp jatqanyn qaıdan biledi?! ıAǵnı kórermen baǵdarlamany kóredi, kórgen soń joba ony az da bolsa qyzyqtyrady, nazaryn aýdartady degen sóz. Bul - bizdiń jeńis!", - dep qosty ol.