Korean Broadcasting System telekompanııasynyń túsirilim toby Býrabaıda boldy
KÓKShETAÝ. QazAqparat - Qazaqstan jaıly baǵdarlama túsirýge kelgen Ońtústik Koreıanyń eń tanymal Korean Broadcasting System telekompanııasy Býrabaı kýrortynda boldy, dep habarlaıdy QazAqparat tilshisi.
Aqmola oblystyq Visit Aqmola týrıstik aqparattyq ortalyǵynyń málimeti boıynsha, Korean Broadcasting System Ońtústik Koreıadaǵy eń tanymal iri telekompanııalardyń biri jáne atalmysh ujym Qazaqstan týraly telebaǵdarlama túsirmekshi.
«Baǵdarlama týrıster (bekpekkrah) týraly bolmaq. Túsirilimge Qazaqstandaǵy Nur-Sultan, Almaty qalalary sııaqty kórnekti oryndar men tabıǵaty ǵajaıyp Býrabaı kýrorty tańdap alynǵan. Túsirý toby kýrortty aımaqta Naýryz meıramynyń toılaný barysyn tamashalap, qazaq halqynyń baı mádenıetimen tanysty, túrli sporttyq oıyndardy kórip, ulttyq taǵamdardan dám tatty», - deıdi vedomstvo ókilderi.
Sheteldik túsirilim toby Bólektaýdyń shyńyna shyǵyp, Býrabaı kýrortynyń teńdessiz ásem tabıǵatyn tamashalady. Jergilikti turǵyndarmen kezdesip, demalyp jatqan týrıstermen suhbattasty.
«Aqmola oblysynyń ákimdigi men oblystyq týrızm basqarmasy «Kazakh Tourism» UK AQ-men birlesip óńirdi jarnamalaý maqsatynda iri telekompanııalar men týroperatorlar tartýda. Óńirge Ońtústik Koreıa ókilderiniń kelýi týrısterdiń Býrabaı kýrortyna qyzyǵýshylyǵy men nazaryn arttyra túsetini sózsiz. Bul baǵyttaǵy jumystar odan ári jalǵasatyn bolady. Jyl ishinde óńirge eýropalyq jáne azııalyq taǵy birneshe iri telekompanııa ókilderi keledi dep kútilýde. Olar Býrabaıda bolyp, kýrortty óńir týraly kórermenderine baǵdarlama túsiredi», - dep bólisti Aqmola oblysy ákiminiń orynbasary Marat Iǵalıev.
