«Kore ılbo» gazeti Almatyda 95 jyldyq mereıtoıyn atap ótti
ALMATY. QazAqparat - Almatyda 95 jyldyq tarıhy bar «Kore ılbo» respýblıkalyq gazetiniń mereıtoıy atap ótildi, dep habarlaıdy QazAqparat tilshisi.
«Kore ılbo» respýblıkalyq káris gazetiniń alǵashqy sany 1923 jyly 1 naýryzda jaryqqa shyqqan. Reseıdiń qıyr shyǵysynda «Seonbong» (선봉) degen ataýmen taralǵan basylym, 1937 jyly káristermen birge Qazaqstanǵa «jer aýdaryldy». Qyzylordaǵa ornalasqan redaktsııa «Lenın kıchı» (Lenın týy) atalyp, gazet káris tilinde basyldy. Respýblıkaaralyq statýsy bar gazet Ortalyq Azııa elderinde tanymal. Soǵys jyldary men qaıta qurý kezeńderinen ótken baspasózdiń baı tarıhyn bas redaktor Konstantın Kım baıandap berdi.
«1991 jyly Qazaqstan táýelsizdik alǵanda «Kore ılbo» ataýyn aldy. Qazaqsha maǵynasy «Káris kúndeligi» degendi bildiretin basylym betinde káris etnostary týraly maqalalar jazylady. Elimizdegi qoǵamdyq-saıası ahýaldy da kóteretin gazet káris jáne orys tilderinde shyǵady. Koreı túbegindegi taqyryptardy qozǵap, shet memleketterdegi qandastarymyz týraly qalam terbeımiz», - dedi gazettiń bas redaktory Konstantın Kım.
Onyń aıtýynsha, Keńes tusynda gazet tırajy 15 myń danamen taralsa, búginde onyń sany 1500-di quraıdy.
«Barlyq álemdik, jetekshi baspasóz quraldary mundaı ótpeli kezeńdi bastan keshýde. Qazir basylymnyń ǵalamtorlyq nusqasyn damytýǵa kúsh salýdamyz. Zamanaýı tendentsııadan qalmaý kerek. Al gazet mádenıetimizdiń, tarıhymyzdyń qaınar bulaǵy, rýhanı muramyz bolyp qala bermek», - dedi ol.
Kópultty Qazaqstannyń medıakeńistiginiń ajyramas bóligi sanalatyn «Kore ılbony» mereıtoıymen quttyqtaýǵa Qazaqstan halqy Assamblesy tóraǵasynyń orynbasary Leonıd Prokopenko keldi.
«Deportatsııa kezinde Qazaqstanǵa jer aýdarylǵan ulttardyń ishinde óz gazeti men teatryn alyp kelgen birden-bir ult - kárister. Osyǵan qarap-aq mádenıetke, salt-dástúrge qandaı qurmetpen qaraıtyndaryńyzdy baıqaýǵa bolady. Sizder beıbit ómir súrýdiń, talmaı eńbek etýdiń úlgisizder. Artta qalǵan qıyn kúnder úshin aǵa býynǵa alǵys», - dedi ol.
