Qordaılyq jalǵyzbasty anaǵa qaıyrymdy jandar baspana alyp berdi
Aýdandyq «Qordaı» meshiti jamaǵatynyń kómegimen Gúlzat Ilıazova esimdi jalǵyzbasty anaǵa baspana usynyldy. Úı ıesiniń qýanyshymen bólisýge aýdan ákimi Rústem Dáýlet, Jambyl oblysynyń bas ımamy Beıbit Myrzageldıev, «Zeket» qorynyń ókili Bekbolat Myńbaev, aýdandyq meshit ókilderi jáne qadirli qarııalar jınaldy. Qonaqtar baspanaly bolǵan janǵa izgi tilekterin aıtyp, aqsaqaldar batasyn berdi.
«Búgingi úı ıesin qýanyshymen quttyqtaımyn. Barlyǵymyz aýdanda qaıyrymdy isterdiń artyp jatqanynyń kýási bolyp júrmiz. Osy ıgi istiń basynda júrgen azamattarǵa, «Zeket» qoryna, ımamdarǵa alǵysymdy aıtamyn. Bıyl jomart jandardyń kómegimen taǵy birneshe otbasy baspanaly bolady dep senim artamyn. Tek jaqsylyqtar bolsyn», – dedi aýdan basshysy Rústem Dáýlet.
Aıta keteıik, Qazaqstan musylmandary dinı basqarmasy jáne «Zeket» qorynyń bastamasymen respýblıka kóleminde «El úlesi – páterge» atty qaıyrymdylyq jobasy iske asyrylyp keledi. Osymen ekinshi jyl qatarynan muqtajdarǵa baspana syılaǵan ıgi bastama aıasynda eki júzden astam otbasy úıli boldy. Al Qordaı aýdany boıynsha úshinshi otbasyǵa úı kilti berildi.
«Ramazan aıynda biz keremet is-sharanyń kýási bolýdamyz. Bul «El úlesi – páterge» jobasy aıasyndaǵy oblys boıynsha 11-shi bolsa, respýblıka boıynsha 211-shi úı. Eger biz árdaıym yntymaǵymyzdy, birligimiz ben janashyrlyǵymyzdy kórsete bilsek, elde qınalǵan otbasy bolmaıtynyna senemin», – dep bas ımam Beıbit Myrzageldıev saltanatty túrde úı kiltin Gúlzat Ilıazovaǵa usyndy.
Baspana kóptiń kómegimen jınalǵan 8,5 mln teńgege satyp alynǵan. 10 sotyq jeri, 5 bólmesi jáne qorasy bar.
