Qordaılyq turǵynnyń úıinen geroın tabyldy
TARAZ. QazAqparat -Jambyl oblysynda «Kóknar-2019» jedel-aldyn alý is-sharasy barysynda Qordaı aýdanynyń turǵynynan eki keliden astam geroın tabyldy, dep habarlaıdy QazAqparat.
Іs-shara kezinde oblystyq polıtsııa departamentiniń Esirtki qylmysyna qarsy is-qımyl basqarmasynyń qyzmetkerleri Qordaı aýylynda turatyn 45 jastaǵy er adamnyń úıine sanktsııalanǵan tintý jumystaryn júrgizdi.
«Tekserý barysynda onyń saraıynan shúberekke oralǵan eki brıket tabyldy. Olardyń ishinde quramynda untaq tárizdi zaty bar eki polıetılen oramasy tabylǵan. Sot-hımııalyq saraptama aktisine sáıkes, alynǵan zattar jalpy salmaǵy 2 keli 51 gramm «geroın» esirtki quraly ekendigi anyqtalǵan»,- deıdi polıtsııa departamenttiń baspasóz qyzmetiniń jetekshisi Gúlsara Muhtarqulova.
Kúdikti kinásin moıyndap, atalmysh aýdandyq polıtsııa bóliminiń ýaqytsha ustaý ızolıatoryna qamaqqa alyndy. Qazirgi ýaqytta Qylmystyq kodekstiń 297-babynyń 3-bóligi boıynsha sotqa deıingi tergeý amaldary júrgizilýde.
