Qordaılyq eki turǵynnyń úıinen bir keliden astam geroın tabyldy
Polıtseıler asa iri kólemdegi esirtki zatyn satýshylardy ustady. Bul týraly oblystyq PD baspasóz qyzmeti habarlady.
«25 aqpan kúni arnaıy jedel-izdestirý is-sharalary barysynda Jambyl oblysy PD Esirtki qylmysyna qarsy is-qımyl basqarmasynyń qyzmetkerleri Qordaı aýdanynyń 45 jáne 42 jastaǵy eki turǵynynyń turǵylyqty mekenjaıyna tintý jumystaryn júrgizdi. Polıetılendi qaltashaǵa salynǵan esirtki zaty kúdiktilerdiń biriniń úıinen, ekinshisiniń jazǵy as úıinen tabyldy»,-delingen vedomstvo habarlamasynda.
Sot-hımııalyq saraptamasynyń aktisine sáıkes, tárkilengen zat geroın ekendigi anyqtalǵan. Esirtkiniń bul aýyr túriniń jalpy salmaǵy bir keliden asady.
Qazirgi ýaqytta atalǵan derekke qatysty QR QK-niń 297-baby 3-bóligimen sotqa deıingi tergeý amaldary júrgizilýde. Kúdiktiler ýaqytsha ustaý oqshaýlaǵyshyna qamaldy.