Qordaıǵa qonaqqa kelgen elordalyq erli-zaıyptylar koronavırýstan aıyǵyp ketti
TARAZ. QazAqparat – 20 sáýir kúni Jambyl oblysynda koronavırýs ınfektsııasynan taǵy bes adam emdelip, úıine shyǵaryldy. Olardyń qatarynda Túrkııa azamaty, Nur-Sultan qalasy, Qordaı aýdany jáne Almaty oblysynyń turǵyndary bar, dep habarlaıdy QazAqparat oblys ákimdiginiń resmı saıtyna silteme jasap.
1961 jyly týǵan Túrkııa azamaty Jambyl oblysyna Qyrǵyz Respýblıkasynan úlken júk kóligimen kelgen. COVID-19 taldaýy oń nátıje kórsetkennen keıin ınfektsııalyq statsıonarǵa jatqyzylǵan bolatyn. Sol sekildi 1999 jyly týǵan Almaty oblysynyń turǵyny Delı-Taraz reısiniń koronavırýs ınfektsııasy anyqtalǵan alty jolaýshysynyń biri bolyp tabylady.
Al, 1990 jáne 1991 jyly týǵan erli-zaıyptylar Nur-Sultan qalasynan Qordaı aýdanynda kelgen kezde olardan COVID-19 vırýsy tabylǵan edi. Búginde olar qaýipti dertten aıyqty. Sondaı-aq, Qordaı aýdanynyń 1996 jyly týǵan turǵyny jaqyn baılanysta bolǵany úshin 3 sáýirde aýrýhanaǵa jatqyzylyp, koronavırýstyq ınfektsııa dıagnozy rastalǵan.
Bul tulǵalardyń bári eki apta boıy ınfektsııalyq statsıonarda em aldy. Algorıtmge sáıkes, olardan KVI-ǵa qaıtadan zerthanalyq taldaý alynyp, ol teris nátıje kórsetti. Endi olar aldaǵy eki apta boıy úı karantınine jatqyzylyp, dárigerlerdiń baqylaýynda bolady.
Búgingi tańda ınfektsııalyq statsıonarda 46 naýqas em alýda, jaǵdaıy turaqty.
Jalpy aımaqta osymen 11 adam koronavırýstan saýyǵyp shyqty.
