«Qordaıdyń» máselesin jańadan ashylatyn «Qarasý» shekara beketi sheshýi tıis

ASTANA. 25 sáýir. QazAqparat - Shyny kerek, «Qordaı» shekara beketindegi jaǵdaı aýyr boldy. Qazir de ol ońyp turǵan joq. Bul týraly búgin Astanada ótken baspasóz máslıhatynda QR Qarjy mınıstrligi Kedendik baqylaý komıtetiniń tóraǵasy Májıt Esenbaev

 aıtty.

«Men ondaǵy jaǵdaıdy basqasha sıpattaı almaımyn», - deıdi komıtet basshysy. Onyń aıtýynsha, 50-70 adamnan quralǵan top  «Qordaı» beketinde san alýan zań buzýshylyqtardyń bastamashysy bolyp jatady. Olar shekarada turyp qalǵan saýdagerlerdi aldyna salyp alyp, kedendik bekettiń tas-talqanyn shyǵarýǵa deıin barady. Qazirgi kezde komıtet atalǵan top boıynsha tergeý amaldaryn júrgizýde. «Bálkim, aldaǵy ýaqytta jańa «Qarasý» shekara beketi ashylǵannan keıin, «Qordaıdaǵy» jaǵdaı turaqtalady», - deıdi M.Esenbaev.

Komıtet basshysy atap kórsetkendeı, búgingi tańda Qazaqstan men Qyrǵyzstan arasynda arnaıy úkimetaralyq hattamaǵa qol qoıyldy. Oǵan sáıkes, qazaq-qyrǵyz shekarasy birlesip baqylanatyn bolady.