Qordaıdan 600-ge jýyq otbasy Shý aýdany men Almaty oblysyna jumysqa attandy

TARAZ. QazAqparat –Jambyl oblysynyń Qordaı aýdanynda turatyn 500-ge jýyq otbasy Shý aýdanyna jáne 100-den astam otbasy Almaty oblysyna egis jumystaryna attandy, dep habarlaıdy QazAqparat.

Jambyl oblysy ákiminiń baspasóz qyzmetinen málim etkendeı, kóktemgi dala jumystaryna Qordaı aýdanynan 467 otbasy Shý aýdanyna attansa, budan bólek 117 otbasy pııaz jáne basqa da kókónis daqyldaryn egýmen aınalysatyn kórshiles Almaty oblysyna bet túzegen.

Qordaı aýdanynda aýyl sharýashylyǵy maqsatyndaǵy jerdiń jalpy kólemi 606 myń gektardy quraıdy. Bıylǵy jyly egistikke 123 myńnan astam gektar alqap bólindi. Bul jerlerge dándi jáne maıly daqyldar, qant qyzylshasy, kartop, kókónis egý josparlanǵan.

Eginshiler kóktemgi dala jumystaryna aldyn ala qamdanyp, egý úshin sapaly tuqymdar daıyndaǵan. 560-tan astam traktor, 278 tuqym sepkish, 1600-den astam tyrma jáne 150 qopsytqysh qondyrǵylary ázirlengen. Olardyń qatarynda lızıngke satyp alynǵan jańa qondyrǵylar da bar. Aýyl sharýashylyǵy tehnıkalaryn janar-jaǵarmaımen qamtamasyz etý máselesi de oń sheshimin tapqan. Dala jumystaryn júrgizýge 2405 tonna jeńildetilgen dızel otyny qarastyrylǵan. Mıneraldy tyńaıtqyshtarǵa keletin bolsaq, aýdanda bul másele boıynsha «KazAzot» AQ jáne «Kazfosfat» JShS-men kelisim jasalǵan.

Kóktemgi dala jumystary barysynda 81,5 myń gektar aýylsharýashylyq jerleri nemese josparlanǵan alqap 100 paıyz egistikke daıyndalǵan. Búginde jazdyq arpa, kópjyldyq shópter, kókónis, baqsha daqyldary tolyǵymen egilip úlgerildi. Maıly daqyldar men júgeri dánin sebý sharalary jalǵasýda. Jumystar barlyq agrotehnıkalyq sharalardy qatań saqtaı otyryp jáne egýge qolaıly merzimde atqarylýda.

Búgingi tańda aýdanda kúzdik bıdaı 22 myń gektarǵa, arpa - 42 myń gektarǵa, kópjyldyq shópter men kókónister 8,200 gektarǵa, kartop - 3200 gektarǵa egilgen.

Aýdandaǵy Jambyl aýyldyq okrýgi aýyl turǵyndarynyń tabysyn arttyrý boıynsha pılottyq jobaǵa qatysýshylardyń qataryna engen. Ondaǵy sharýalar 8,5 mıllıon teńgege qarjylandyrylǵan «Janatýrmys-Birlik» kooperatıvine birigýde. Atalǵan qarajat tuqymdar, tyńaıtqyshtar jáne ósimdikterdi hımııalyq qorǵaý quraldaryn satyp alýǵa baǵyttalǵan.

Joba aıasynda 950 aýla qamtylǵan. Olardyń ıeligindegi 62 gektar aýyl sharýashylyq jerlerine kartop, qııar jáne sábiz egildi. Kooperatıv músheleri 620 tonnaǵa deıin kartop, 434 tonna sábiz jáne 192 tonna qııar alýdy josparlap otyr.