Qordaıdaǵy jol apaty: Máýlen Áshimbaev marqumdardyń týystaryna kóńil aıtty

NUR-SULTAN. QazAqparat - «Nur Otan» partııasy tóraǵasynyń birinshi orynbasary Máýlen Áshimbaev Jambyl oblysynda oryn alǵan iri jol apatynda kóz jumǵan marqumdardyń otbasyna kóńil aıtty, dep habarlaıdy QazAqparat tóraǵa orynbasarynyń Feısbýktegi paraqshasyna silteme jasap.

«Jambyl oblysyndaǵy iri jol apaty týraly sýyt habar meniń de kóńilimdi qulazytyp jiberdi. Osyǵan baılanysty ózimniń jáne «Nur Otan» partııasynyń atynan apat saldarynan qaza bolǵandardyń otbasy men týǵan-týystaryna qaıǵysyna ortaqtasyp, kóńil aıtamyn. Sondaı-aq zardap shekkenderdiń tezirek saýyǵyp ketýine tilektestigimdi bildiremin», - dep jazdy Máýlen Áshimbaev.

Onyń aıtýynsha, qazirgi tańda osy oqıǵaǵa qatysty arnaıy komıssııa qurylyp, oblystyq ákimdik tarapynan shuǵyl túrde tıisti jumystar júzege asyrylyp jatyr.

«Bul jumystarǵa «Nur Otan» partııasy da belsene aralasyp, qajetti sharalardy qolǵa aldy», - deıdi partııa tóraǵasynyń orynbasary.