Qordaıdaǵy vaktsına shyǵaratyn zaýyttyń qurylysyna qatysty keńes ótti
TARAZ. QazAqparat – Jambyl oblysy Qordaı aýdanyndaǵy bıofarmatsevtıkalyq zaýyt qurylysy boıynsha keńes ótti, dep habarlaıdy QazAqparat tilshisi.
Jambyl oblysynyń ákimi Berdibek Saparbaev Qordaı aýdanyndaǵy bıologııalyq qaýipsizdik problemalary ǵylymı-zertteý ınstıtýty bazasyndaǵy bıofarmatsevtıkalyq zaýyttyń qurylysy boıynsha keńes ótkizdi.
Oǵan Qazaqstan Respýblıkasy Premer-Mınıstri Keńsesi Kantsleriniń orynbasary Oljas Smaǵulov, Densaýlyq saqtaý mınıstriniń birinshi orynbasary Marat Shoranov jáne Bilim jáne ǵylym mınıstriniń orynbasary Mıras Daýlenov qatysty. Sonymen qatar basqosýda Bıologııalyq qaýipsizdik ǵylymı-zertteý ınstıtýtynyń basshylary, múddeli memlekettik organdar, sarapshylar men merdigerlerdiń ókilderi de boldy.
Zaýyttyń qurylysy Memleket basshysy Qasym-Jomart Toqaevtyń tapsyrmasyna sáıkes júrgizilýde. Kásiporynda álemdik standarttar boıynsha ımmýnobıologııalyq preparattar, onyń ishinde koronavırýstyq ınfektsııaǵa, tumaýǵa, týberkýlezge, brýtsellezge, nodýlıarlyq dermatıtke jáne basqa da ınfektsııalyq aýrýlarǵa qarsy vaktsınalar shyǵarý josparlanýda. Jyldyq óndiris kólemi 30-60 mıllıon doza bıologııalyq ónimdi quraıdy.
Kezdesý barysynda jobany iske asyrýdaǵy aǵymdyq máseleler, sonyń ishinde qurylys-montajdaý jumystary, óndiristik jabdyqty satyp alý jáne ornatý, valıdatsııa jáne GMP sertıfıkattaý rásimderi jáne basqa da jaıttar saralandy.
«Zaýyttyń strategııalyq mańyzy bar, sondyqtan jumys sapasyna jáne belgilengen merzimde aıataýǵa basa nazar aýdarý qajet. Zaýyt óndiristik tájirıbeniń (GMP) halyqaralyq standarttaryna sáıkes kelýi tıis. Bul úshin barlyq memlekettik organdar men qurylymdardyń úılesimdi jumysy qajet», — dedi Berdibek Saparbaev.
