Qordaıdaǵy vaktsına shyǵaratyn zaýyt qyzmetkerlerine arnalǵan kópqabatty 3 úı salynady
TARAZ. QazAqparat – Qordaı aýdanyndaǵy vaktsına shyǵaratyn zaýyt qyzmetkerlerine arnalyp úsh kópqabatty úı paıdalanýǵa beriledi, dep habarlaıdy QazAqparat tilshisi.
Qordaı aýdanyna jumys sapary barysynda oblys ákimi Berdibek Saparbaev Gvardeıskıı aýylyna bardy.
Munda bıologııalyq qaýipsizdik máseleleri ınstıtýtynyń negizinde farmatsevtıkalyq zaýyttyń ǵımaraty boı kótergen. Joba boıynsha jylyna 60 mıllıon doza túrli vaktsınalar shyǵarý josparlanyp otyr desek, onyń ishinde koronavırýsqa qarsy vaktsına da bar.
Aımaq basshysy nysannyń birneshe qabatyn aralap, taza ǵımarat keshenimen tanysty.
Sondaı-aq, zaýytty paıdalanýǵa berý máselesi boıynsha keńes ótkizdi.
Berdibek Saparbaev qajetti qural-jabdyqtarmen qamtamasyz etý jumystaryna tıisti baqylaýdyń bolýyna nazar aýdartty.
Ol múddeli taraptardy nysannyń barlyq GMP standarttaryna sáıkes kelýin qamtamasyz etý úshin birlesip jumys isteýge shaqyrdy.
Zaýytqa jaqyn mańda ınstıtýt qyzmetkerlerine arnalyp 3 kópqabatty turǵyn úı salýǵa oryn bólingen. Búginde 60 páterli úıdiń birinde ishki árleý jumystary júrýde, al eki kópqabatty turǵyn úıdiń qurylysy aǵymdaǵy jyly bastalady.
Berdibek Saparbaev 60 páterli úıde júrip jatqan árleý jumystaryn naýryz aıynda aıaqtaýdy tapsyrdy. Joba boıynsha munda 1, 2 jáne 3 bólmeli páterler bolady.
