Qordaıdaǵy qaqtyǵys: Qandaı jumystar júrgizildi

QORDAI. QazAqparat – Byltyr Qordaı aýdanynda bolǵan oqıǵa kezinde Masanshy aýylyndaǵy birqatar úı men kásipkerlik nysan zardap shekken bolatyn. Búgin BAQ ókilderine aýdan ákimi Rústem Dáýlet osy ýaqyt aralyǵyda qandaı jumystar júrgizilgenin aıtyp berdi, dep habarlaıdy QazAqparat tilshisi.

«Byltyr memleketten aýdandaǵy 392 jobaǵa 35 mlrd teńge bólindi. Onyń ishinde 11 mlrd teńgege 22 aýyl gazdandyrylyp, aýdan búginde 95 paıyz gazben qamtyldy. Sol sııaqty, 6,9 mlrd teńgege kósheler jóndeldi»,-deıdi aýdan ákimi.

Qaqtyǵys kezinde Masanshy, Bular batyr jáne Aýhatty aýyldarynda 65 nysan zaqymdandy, onyń ishinde 46 turǵyn úı, 18 kommertsııalyq ǵımarat, 1 qosalqy ǵımarat jáne 62 kólik (47 jeńil mashına, 9 júk kóligi, 2 traktor, 4 tirkeme). Búginde olardyń bári memleket jáne demeýshiler tarapynan qalpyna keltirildi.

QR «Azamattyq qorǵaý týraly» Zańyna sáıkes, eń aldymen turǵyn úı ótelýge jatady. Osyǵan baılanysty smetany qaıta esepteý jumystary júrgizildi. Nátıjesinde 213 mln teńgege 54 jyljymaıtyn múlik nysany jóndeldi.

Búgingi kúni 51 nysannyń qurylysy bastaldy (40 úı, 11 kommertsııalyq), 39-da (30 úı, 9 kommertsııalyq) qurylys tolyǵymen aıaqtaldy. Qalǵan 12 (10 úı, 2 kommertsııalyq) nysanda jumys 80% -ǵa oryndaldy. Qurylys jumystaryna bólingen 213 mln teńgeniń 175,4 mln teńgesi jumsaldy.

Turǵyn úılerdi tolyq qalpyna keltirý tamyz aıynda, al kommertsııalyq nysandardy qyrkúıekte aıaqtaý josparda.

Órtten zardap shekken 39 otbasyna áleýmettik kómek kórsetý úshin oblystyq bıýdjettiń rezervinen 20 677,8 teńge bólindi. Onyń ishinde ár otbasyna 530,2 myń teńge (200 AEK) tólendi.

Qaıtys bolǵan bir azamattyń 960 myń teńge nesıesi tólendi jáne jerleý rásimine qarjylaı kómek kórsetildi. Sonymen qatar, 9 dúngen ultynyń otbasyna 250 myń teńge kóleminde materıaldyq kómek kórsetildi.

Dúngen etnomádenı birlestikteri tarapynan, Sortóbe jáne Qarakemer aýyldarynyń turǵyndary jáne Qordaı aýdanynyń kásipkerleri 4,7 mln teńge kóleminde materıaldyq kómek kórsetti. Qaıyrymdylyq kómekten bólek, «QR Múgedektigi boıynsha jáne asyraýshysynan aırylýyna baılanysty memlekettik áleýmettik tólemder týraly» Qazaqstan Respýblıkasynyń 1997 jylǵy 16 maýsymdaǵy Zańyna sáıkes múgedektigi boıynsha járdemaqy alýǵa baılanysty qaıtys bolǵan azamattardyń eki otbasyna 15,2 AEK nemese 41 621 teńge tólendi. Sondaı-aq, 18 jasqa deıingi balalary bar qaıtys bolǵan 9 otbasy múshelerine asyraýshysynan aırylý jaǵdaıy boıynsha járdemaqy taǵaıyndaldy.