Qordaıdaǵy iri jol apaty: 11 adamnyń ólimine kináli avtobýs júrgizýshisi sottaldy
TARAZ. QazAqparat –Jambyl oblysy Qordaı aýdanyndaǵy birneshe kólik soqtyǵysqan jol apaty kezinde on bir jolaýshynyń ólimine kináli dep tanylǵan avtobýs júrgizýshisi sottaldy, dep habarlaıdy QazAqparat oblystyq sottyń baspasóz qyzmetine silteme jasap.
Júrgizýshi QR QK-niń 345-babynyń 4-bóligimen, ıaǵnı, kólik quralyn basqaratyn adamnyń jol júrisi nemese kólik quraldaryn paıdalaný qaǵıdalaryn abaısyzda eki nemese odan da kóp adamnyń ólimine ákep soqqan buzýy boıynsha aıyptaldy.
«Qordaı aýdandyq soty júrgizýshiniń shynaıy ókingenin, turǵylyqty jeri boıynsha jaqsy minezdemesi bar bolǵanyn, buryn sottalmaǵandyǵyn qylmystyq jaýapkershilik pen jazany jeńildetetin mán-jaılarǵa jatqyza otyryp, sondaı-aq onyń is-áreketin aýyrlatatyn mán-jaılardyń bolmaýyn esepke aldy», - delingen vedomstvo habarlamasynda.
Sot júrgizýshini 5 jylǵa bas bostandyǵynan aıyryp, 7 jyl merzimge kólik quralyn basqarý quqyǵynan aıyrý jazasyn taǵaıyndady. Odan jábirlenýshiler úshin ótemaqy qoryna 15 AEK mindetti tólem óndiriledi.
Sot úkimi zańdy kúshine engen joq.
Eske sala keteıik, 20 sáýirde saǵat tańǵy 05.00 shamasynda «Batys Qytaı – Batys Eýropa» tasjolynda «Toıota-Kamrı» markili avtokóliktiń júrgizýshisi «Mersedes-Bents 814» markili avtokólikpen soqtyǵysqan. Osydan keıin «Toıota-Kamrı» jol qaýipsizdiginiń temir qorshaýyna tirelip toqtaıdy. Sol baǵytta júrip kele jatqan «Wan Hool» avtobýsy «Toıota-Kamrı» avtokóligine kelip soǵylady.
Júrgizýshi kólik tizginine ıe bola almaı, avtobýs aýdarylady. Іri jol apatynan avtobýstyń 11 jolaýshysy qaıtys bolyp, eki jolaýshy aýyr dene jaralanyp, segiz adam ortasha dene jaraqatyn alǵan.
