Qordaıda Ótegen batyrdyń 320 jyldyǵy keń kólemde atalyp ótti
Shara barysynda aldymen elimizdiń birqatar óńirinen kelgen qonaqtar Batyr eskertkishiniń aldyna gúl shoqtaryn qoıyp, rýhyna taǵzym etti. Odan soń Ótegen batyr atyndaǵy aýdandyq mádenıet úıinde tulǵa taǵylymyna arnalǵan jıyn uıymdastyryldy. Jıynǵa kelgen kópshilik Ótegen batyrdyń Abylaı hannan alǵan shubar tegenesin tamashalady. Búginde bul tegene batyrdyń segizinshi urpaǵy Baqytjan Bekbatyrovtyń qolynda saqtaýly eken. Batyr taǵylymyna arnalǵan jıynda belgili jazýshy Maral Ysqaqbaı sóz alyp, Ótegen batyr ómirinen syr tolǵady.
1699 jyly Shý ózeniniń boıyndaǵy Izendi degen jerde dúnıe esigin ashqan Ótegenniń jastaıynan ǵylym-bilimge qumartyp, Buhara, Samarqan, Sham, Baǵdat sııaqty ataqty rýhanııat ordalarynda bolǵany týraly da keńinen áńgimelendi. Sonymen qatar Túrkistan, Tashkent mańyndaǵy jáne Ańyraqaı dalasyndaǵy qııan-keski shaıqastarda da erlik kórsetkeni aıtyldy. Budan keıin Qazaqstannyń eńbek sińirgen dárigeri, belgili metsenat Músilim Daıyrbekov, Almaty oblysy, Іle aýdany ákiminiń orynbasary Almasbek Sátibaev, Іle aýdandyq ardagerler keńesiniń tóraǵasy Ámze Áldibekuly jáne Taraz qalasy ákiminiń orynbasary Kenjebek Oljabaı sóz alyp, erligi elge ańyz bop jetken Ótegen batyrdyń esimi ultymyz úshin árdaıym qasterli ekenin atap ótti. Óz kezeginde Ótegen batyr jáne onyń urpaqtary týraly jaryq kórgen kitaptyń tusaýy kesildi. Jıyn barysynda qordaılyq ónerpaz Qarlyǵash Qojaǵazına jáne Almaty oblysy, Іle aýdanynyń ájeler ansambli ásem ánnen shashý shashty.
Merekelik shara budan ári Ótegen batyr aýylynda jalǵasyn tapty. Kópshilik batyr kesenesine arnaıy baryp, babalar rýhyna Quran baǵyshtady. Aýyl meshiti mańyndaǵy alańqaıda kúres, 33 shaqyrymdyq alaman báıge uıymdastyrylyp, jeńimpazdar sońǵy úlgidegi «temir tulparlarǵa» ıe boldy.
Aıta keteıik, Esimi elge málim, urpaqqa uran bolǵan Ótegen batyr qazaq tarıhyndaǵy tegeýrindi tulǵalardyń biri. Uly jyraý Jambyl Jabaev batyr týraly tolǵaýynda «Jolbarystaı qarýly, qyrandaıyn qyraǵy, arystandaı aıbarly» dep jyrlaıdy. Ótegen batyr jasynan erligimen kózge túsip, el qorǵaýda erekshe erjúrektiligin tanytqan tulǵa. Batyr esimi urpaqqa ulaǵat retinde Súıinbaı, Sarbas, Maıkót, Jambyl sııaqty alyptardyń óleń-jyrlaryna arqaý bolǵan. Tarıhı derekter boıynsha batyr 74 jasynda Іle boıynda ómirden ótken eken. Keıinnen batyrdyń urpaqtary Qapshaǵaı sý qoımasynyń salynýyna baılanysty súıegin 1973 jyly Qordaı jerine ákelip, jer qoınyna bergen. Al 1999 jyly batyrdyń úsh ǵasyrlyq toıy respýblıkalyq deńgeıde atalyp ótip, basyna kesene turǵyzylǵan. Aýdan ortalyǵy Qordaı aýylyna eskertkishi ornatylǵan. Budan bólek, Almaty qalasynyń bir kóshesine jáne Іle aýdanynyń ortalyǵyna da Ótegen batyr esimi berilgen.
