Qordaıda qazaqtildi synyptarǵa suranys kóbeıgen
NUR-SULTAN. QazAqparat – Jambyl oblysy ákiminiń orynbasary Erjan Jylqybaev Qordaı aýdanyndaǵy qazaq tiliniń mártebesin kóterý jumystaryn baıandady, dep habarlaıdy QazAqparat tilshisi.
«Aýdanda qazaq tili pánin oqytýshylardyń biliktiligin, sapasyn arttyrý kerek. Ol úshin oblys ákiminiń tapsyrmasymen memlekettik ýnıversıtet mamandaryn tartyp, qosymsha qazaq tili kýrstaryn ashtyq. Jyl sońyna deıin myń jarym adam, sonyń ishinde qazaq tili pániniń oqytýshylary kýrstan ótedi», - dedi spıker Ortalyq kommýnıkatsııalar qyzmetinde ótken onlaın baspasóz máslıhatynda tilshi suraǵyna bergen jaýabynda.
Sonymen birge, spıker bıylǵy oqý jylynda qosymsha qazaq synyptary ashylatynyn habarlady.
«Ózge ult ókilderi, onyń ishinde ulty dúngen ata-analar balalaryn qazaq tilinde oqytqysy keletinin aıtyp, qosymsha qazaq synyptaryn ashýdy usyndy. Sondyqtan, bıyl qazaqtildi synyptar ashylyp, aýdan boıynsha birinshi synypqa qabyldanatyn 1500 bala qazaq tilinde oqıtyn bolady. Jalpy bul baǵytta da júıeli jumys istep kelemiz», - dedi E. Jylqybaev.
Buǵan deıin spıker aýdanda zardap shekken 65 nysannyń 54-inde qalpyna keltirý jumystary bastalǵanyn habarlady.
Asyraýshysynan aıyrylý jaǵdaıyna baılanysty, qaıtys bolǵan jandardyń otbasylaryna aı saıyn orta eseppen 55 myń teńge áleýmettik járdemaqy taǵaıyndalyp, tólenip jatyr.
Sonymen birge, jyl sońyna deıin aýdanda jol jóndelip, gaz qubyry tartylady. Jańa mektepter men turǵyn úıler salynady.
