Qordaıda Qazaqstan men Qyrǵyzstan Parlament músheleriniń kezdesýi ótti
TARAZ. QazAqparat - Qordaı aýylynda búgin QR Parlamenti Senaty Komıtetiniń basshysy Darıǵa Nazarbaevanyń tóraǵalyǵymen qazaqstandyq jáne qyrǵyzstandyq depýtattardyń parlamentaralyq kezdesýi ótti, dep habarlady «QazAqparat» HAA tilshisi.
Kezdesý aldynda delegatsııa qazaqstandyq «Qordaı» kedeni men qyrǵyzstandyq «Aqjol» ótkizý pýnktterine bardy, jańa jabdyqtardy tamashalady.
Qatysýshylar - tóraǵasy Asqarbek Shabıevtiń basshylyǵymen Qyrǵyz Respýblıkasy Jogorký Keneshiniń Halyqaralyq qatynastar, qorǵanys jáne qaýipsizdik komıtetiniń depýtattary jáne QR Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń músheleri boldy.
Kezdesýde eki eldiń ózekti máseleleri talqyǵa tústi, atap aıtqanda, transshekaralyq ózender boıynsha sý bólý, jambyldyq agrarshylardy sýarmaly sýmen qamtamasyz etý, eki eldiń sharýashylyq etýshi sýbektileri arasynda saýda-ekonomıkalyq baılanystardy, kedendik problemalar men veterınarııalyq jáne fıtosanıtarlyq baqylaýdy retke keltirý.
«Kezdesýimiz Jambyl oblysynyń qýatty da serpindi damyp kele jatqan óńirleriniń biri Qordaıda ótýi óte oryndy. Qazaqstan Qyrǵyzstanmen dıplomatııalyq qatynasty ornatýynyń 25 jyldyǵyn atap ótýde, ári bıyl Qazaqstan Respýblıkasy men Qyrǵyz Respýblıkasy arasyndaǵy máńgilik dostyq týraly shartqa qol qoıǵanǵa 20 jyl tolady. Búgingi kezdesý bizdiń dostyq tatý kórshilik qatynasymyz ben ony nyǵaıtýǵa degen umtylysymyzdy rastaı túsedi», - dedi kirispe sózinde Darıǵa Nazarbaeva.
Eki eldiń túrli saladaǵy qatynasy sharttyq-quqyqtyq bazamen bekitilgeni atap ótildi, osy jyldary 150-den astam qujatqa qol qoıyldy. 2015 jylǵy maýsymda Jogorký Kenesh tóraǵasy A Jeenbekovtiń Astanaǵa jumys sapary aıasynda Qazaqstan Parlamenti men Jogorký Kenesh arasyndaǵy yntymaqtastyq boıynsha parlamentaralyq keńes týraly kelisimge qol qoıylǵan.
