Qordaıda karantın talabyn saqtamaǵan 2 kafe jabyldy

TARAZ. QazAqparat – Jambyl oblystyq shtabtyń kezekti otyrysynda aımaq basshysy Berdibek Saparbaev Taraz qalasy men aýdan ákimderiniń jumysyna kóńili tolmaıtynyn aıtyp, birqatar tapsyrmalar júktedi, dep habarlaıdy QazAqparat tilshisi.

Oblys ákimi jumystyń nátıjesizdigin alǵa tartty. Ár shtab otyrysynda tártip buzyp, shekteý sharalaryna baǵynǵysy kelmeıtin kafe, toıhana ıeleri bar ekeni únemi aıtylýda.

Degenmen, búginge deıin birde-bir tıisti baqylaýshy jergilikti atqarýshy organdardan olardyń jumysyn ýaqytsha toqtatý týraly eshqandaı usynys berilmegen.

Tek Qordaı aýdanynda ǵana eki márte eskertý jasalsa da talapty saqtamaı, jumysyn jalǵastyrǵan eki kafe jabylǵan.

Óńirde indet juqtyrǵandar sany kúnnen-kúnge artyp keledi. Aıtalyq, sońǵy aptada 160-tan astam adamnan koronavırýs anyqtalǵan.

Basqa óńirlermen salystyrǵanda ahýal turaqty, degenmen bosańsýǵa bolmaıdy.

Oblystyq densaýlyq saqtaý basqarmasynyń basshysy Áset Qalıev aǵymdaǵy jyldyń 29 qańtarynan bastap jalpy 204 myńnan asa adamnan koronavırýsqa taldaý alynǵan.

Sońǵy 2 aptada jedel járdemdi shaqyrtý sanynda ósim baıqalyp otyr. 6-19 jeltoqsan aralyǵynda shaqyrtý 3,8 paıyzǵa joǵarylaǵan.

«Qazir basqa oblystarda indettiń órship turǵany málim. Sondyqtan biz barlyq jaǵdaıǵa daıyn bolýymyz kerek. Osyny eskerip, óńirde qosymsha 2000 tósek-orynǵa rezerv jasaqtalýda. Oblysta SOVID-19 indetimen aýyrǵan 515 azamat ońaltý ortalyǵynda em aldy», - deı kele Áset Qalıev atqarylyp jatqan is-sharalar turaqty baqylaýda ekenin jetkizdi.

Berdibek Saparbaev sala basshysyna osy indetpen aýyrǵandardyń tolyq saýyǵyp ketýi úshin atqarylyp jatqan jumysty báseńdetpeı, odan ári jalǵastyrýdy tapsyrdy.

Saılaý ýchaskelerinde sanıtarlyq normalardyń saqtalýy tekserilip, munda anyqtalǵan kemshilikter jedel joıylǵan.

«Biz karantın talaptaryn kúsheıtýimiz kerek. Belgilengen algorıtmge sáıkes, monıtorıngtik toptarǵa sanıtarlyq-epıdemıologııalyq qadaǵalaý departamentiniń, densaýlyq saqtaý basqarmasynyń jáne taǵy da basqa memlekettik organdardyń qyzmetkerlerin qosyńyzdar. Taǵy da qaıtalap aıtamyn, talapty qaıtalap buzǵandarǵa shekteýler qoıylý kerek. Kóp adam qatysatyn is-sharalardy toqtatý qajet. Óńirdiń bas sanıtarlyq dárigerine epıdemıologııalyq jaǵdaıǵa baılanysty sheshim qabyldaýdy tapsyramyn. Tıisti basqarmalar kelesi jyldyń bıýdjetin naqtylaǵan kezde medıtsına salasyn jedel járdem kólikterimenen, qajetti quraldarmen qamtamasyz etý kerek. Bul – bizdiń eń negizgi mindetimiz», - dedi Berdibek Saparbaev.