Qordaıda aýyz sý, gaz jáne turǵyn úı máselesi qalaı sheshilip jatyr
Atalǵan qarajat qalaı ıgerilýde, qandaı máseleler bar, búgingideı pandemııa kezinde jumysshylar kúshi jetkilikti me? Osy jáne ózge de saýaldar aımaq basshysy Berdibek Saparbaevtyń oblysymyzdaǵy halqy eń tyǵyz ornalasqan atalǵan aýdanǵa kezekti jumys sapary barysynda negizge alyndy.
Turǵyndardyń qalypty ómir súrýi úshin eń aldymen sheshilýi tıis qajettiliktiń biri – taza aýyz sý máselesi. Sondyqtan oblys ákimi aýdandaǵy jumys saparyn Aral aýylyndaǵy sý qabyldaǵysh nysan jáne sý qubyrynyń qurylysy barysymen tanysýdan bastady.
Aýdan ákiminiń orynbasary Erlan Orynbaevtyń aıtýynsha, bıyl bul baǵytta 2,7 mıllıard teńgeniń alty jobasy júzege asyrylýda.
Atap aıtsaq, Kenen aýylyndaǵy sý qubyryn tartý jobasy tapsyrylý kezeńinde desek, Qarakemer, Qordaı jáne Otar aýyldaryndaǵy jumystar 80 paıyzǵa, Ótegen jáne Aral aýyldarynda 90 paıyzǵa aıaqtalǵan.
Nysandar paıdalanýǵa berilgennen keıin ortalyqtandyrylǵan sýmen qamtamasyz etý deńgeıi 73-ten 78 paıyzǵa deıin artady dep kútilýde.
Aımaq basshysy nysandy iske qosý kestesin saqtaýǵa jáne aldaǵy ýaqytta sýmen úzdiksiz qamtamasyz etýge basa nazar aýdardy.
Turǵyndardy gazben qamtamasyz etý de basty qajettilikterdiń tiziminen oryn alatyny sózsiz. Osy oraıda «Jumyspen qamtýdyń jol kartasy» memlekettik baǵdarlamasy aıasynda aýdannyń 12 aýyldyq eldi mekenin jáne salynyp jatqan bıofarmatsevtıkalyq zaýytty gazben qamtamasyz etýge baǵyttalǵan «Otar» avtomatty gaz taratý stantsııasynyń qurylys jobasy júzege asýda.
Aımaq basshysyna Energetıka jáne TKSh basqarmasynyń basshysy Qudaıbergen Qorǵanbaev aıryqsha máselelerdiń joqtyǵyn, nysan 60 paıyzǵa daıyn ekendigin jetkizdi. Qazir elektr qondyrǵylary ornatylýda. AGTS-ti 25 jeltoqsannan keshiktirmeı paıdalanýǵa berý josparlanǵan.
Berdibek Saparbaev aýa raıynyń sýymaı turǵanyn paıdalanyp, jumys qarqynyn barynsha arttyrýdy tapsyrdy.
Turǵyn úımen qamtý da – turmys sapasyn arttyrýdyń mańyzdy baǵyttarynyń biregeıi. Osy oraıda Qordaı aýylynda búginde birneshe kóp qabatty úıler boı kóterýde desek, olardyń ekeýin «Batys» turǵyn alqabynda «Agrospetsstroı» JShS salýda.
60 páterlik qos úıdiń biri kirpishten, ekinshisi gazabloktardan turǵyzylýda. Oǵan jaqyn mańnan saıabaq jáne áleýmettik nysandar salý josparlanýda.
Qazirgi kúnde 1524 qordaılyq turǵyn úı kezeginde turǵanyn tilge tıek etsek, olardyń keıbiri osy jyldyń sońyna deıin qonys toıyn toılaıtyn bolady.
Oblys ákimi úılerdiń qasbetterine erekshe nazar aýdarýdy, qajet bolsa, tájirıbeli sáýletshiler men dızaınerlerdi jáne qabyrǵalarǵa organıkalyq mýraldar salý úshin sýretshilerdi tartýdy tapsyrdy.
Sondaı-aq, «Agrospetsstroı» JShS Áljan ana aýylynda quny 323 mıllıon teńgeni quraıtyn dene shynyqtyrý-saýyqtyrý keshenininiń qurylysyn júrgizip jatyr. Igi iske tıisti qarjyny «Samuryq-Qazyna» ulttyq ál-aýqat qory bólgen.
Osy aýyldaǵy 1972 jyldan beri kúrdeli jóndeý kórmegen №23 T.Rysqulov atyndaǵy orta mektep búginde qaıta jańǵyrtylǵan. Adam tanymastaı ózgergen nysannyń shatyry, edeni, jylytý júıeleri aýystyrylyp, jyly dárethana, sý jáne gazben qamtylyp, 27 beınekamera ornatylǵan.
Sport zaldan áli kúnge jańa boıaýdyń ısi seziledi desek, al akt zalyndaǵy sahna perdesin muǵalimderdiń ózderi tigipti. Búgingi tańda jalpy 868 oqýshynyń bastaýysh synyptardaǵy 320 oqýshysy mektepte, qalǵany qashyqtan bilim alýda.
Berdibek Saparbaev dástúrli formatta ótetin sabaqtarda áleýmettik araqashyqtyqty saqtaýdy, sanıtarlyq-epıdemıologııalyq normalardy qatań saqtaýdy tapsyrdy.
