Qordaıda 20 mlrd teńgeden asatyn 400-ge jýyq joba júzege asyrylyp jatyr
Jambyl oblysynyń ákimi Berdibek Saparbaev aýdandaǵy eki kúnge josparlanǵan jumys sapary barysynda atalǵan jobalardyń sapaly oryndalýy, qordaılyqtardyń qoǵamdyq-saıası ahýaly jáne kóńil-kúıleri basty nazarǵa alyndy.
Aldymen, Kenen aýylyndaǵy aýyz sý máselesiniń sheshilý barysymen tanysqan aımaq basshysy birqatar máselelerge nazar aýdardy. Bul túıtkildi sheshý úshin 132 mıllıon teńgege 16 shaqyrymdyq sý qubyry tartylyp jatyr. Onyń ishinde úsh shaqyrym syrtqy sý ótkizgish jáne 13 shaqyrym ishki jeli. Qazirgi ýaqytta toǵyz shaqyrymdyq qubyr tartylǵan.
Aýyldaǵy otbasylyq dárigerlik ambýlatorııada 20 kelýshige bir dáriger jáne segiz medbıke qyzmet kórsetedi. Jastardyń jaqyn ornalasqan Almaty qalasyna kóptep ketýine baılanysty Kenende týý kórsetkishi tómendeýde. Sol sııaqty 600 oryndyq E.Qashaǵanov atyndaǵy №42 mektepte búginde tek 509 oqýshy bilim alýda. Oqý ordasy jańa, 2014 jyly paıdalanýǵa berilgen.
– Balalardyń boıyna ulttyq salt-dástúr men qundylyqtar negizin sińirip, rýhanı-adamgershilik turǵysynda tárbıeleýge erekshe nazar aýdarý qajet. Ásirese, Kenendeı uly tulǵa týǵan aýylda buǵan aıryqsha den qoıa bilgen durys, – dep atap ótti Berdibek Saparbaev.
Jergilikti turǵyndarmen kezdesý barysynda oblys ákimi aýyz sýmen qamtamasyz etý máselesi sheshilip jatqanyn, kóshelerdi jóndeý, jaryqtandyrý jumystary jalǵastyrylatynyn atap ótti. Bes aýyl gazdandyrylyp, shaǵyn sý qoımalary salynbaq.
Aımaq basshysy kópshiliktiń áıgili Ańyraqaı shaıqasynyń ornyna memorıaldyq keshen salý týraly usynysyn qoldaıtynyn aıtty. Ol sondaı-aq kenendikterdi memlekettik baǵdarlamalarǵa belsendi qatysýǵa, bastamashylyq pen iskerlik tanytýǵa shaqyrdy.
Bıyl jyly Qordaı aýdanyndaǵy joldardy jóndeýge jáne salýǵa jergilikti bıýdjetten bir mıllıard teńgeden astam qarjy bólinip, 352 shaqyrymnan astam jol qalpyna keltirilmek. Onda keıbir ortasha jóndeý jumystary aıaqtalǵan. Atap aıtqanda, Muzbel aýylyna kire beristegi joldyń eki shaqyrym bóligi paıdalanýǵa berilgen.
Sondaı-aq, óńir basshysy aýdandaǵy táýligine 1000 tonnaǵa deıin qurylys materıaldaryn shyǵaratyn beton-asfalt zaýytynda bolyp, Qalǵuty aýylynda jańa mekteptiń qurylys jumystary óte baıaý júrgizilip jatqanyn qatty synǵa aldy. Odan bólek, Áljan ana aýylynda «Samuryq-Qazyna Trast» qorynyń qarajaty esebinen júrgiziletin dene shynyqtyrý-saýyqtyrý kesheni qurylysynyń jobasymen tanysty.
