Qordaıda 20-ǵa jýyq júk kóligi qar qursaýynan shyǵaryldy
QORDAI. QazAqparat –Qordaı aýdanynda qar qursaýynda qalǵan 20-ǵa jýyq júk kóligi shyǵaryldy, dep habarlaıdy QazAqparat tilshisi.
Jambyl oblysynyń polıtsııa departamenti 2021 jylǵy 16 qańtarda Jambyl oblysy Qordaı aýdanyndaǵy «Almaty-Tashkent-Termez» avtojolynyń Qordaı asýyn aınalyp ótetin ýchaskesinde aýa raıynyń kúrt nasharlaýyna baılanysty (boran, kórinbeý) avtokóliktiń barlyq túrleri úshin qozǵalysqa shekteý engizilgendigin eskertti.
Bul rette kólik quraldarynyń qozǵalysy Qordaı eldi mekeni men Qordaı eski asýy arqyly qaıta baǵyttalǵan. Joldyń osy ýchaskesinde «QazAvtoJol» UK» AQ Jambyl oblystyq fılıalynyń kúshimen qar qursaýynan 17 júk tehnıkasy shyǵaryldy.
Qazirgi ýaqytta joldy qar úıindilerinen tazartýǵa 15 arnaıy tehnıka jumyldyrylǵan. Onyń ishinde 11 qurama jol tehnıkasy, 2 avtogreıder jáne 2 tıegish bar. Tazalaý jumystary aıaqtalǵannan keıin qozǵalys tolyǵymen qalpyna keltiriledi.
