Qordaı oqıǵasyna bir jyl: Aýdanda oń ózgerister baıqalady
Eseptik jıynǵa oblys ákimi Berdibek Saparbaev arnaıy qatysty. Aýdan ákimi Rústem Dáýlettiń esep berý kezdesýine kelgen Qordaı aýdanynyń turǵyndary el Prezıdentine óz óńirlerinde ornaǵan beıbitshilik pen jalpy abattandyrý jumystary úshin alǵystaryn bildirdi. Ásirese, tirshiligi túbegeıli ózgergen Masanchı aýyly turǵyndarynyń rızashylyǵy erekshe. Qordaı aýyldaryna tabıǵı gaz tartylýda, mektepter men joldar jóndelip jatyr.
«Árıne, barlyq aýyldarǵa gaz tartylǵan joq. Bárin birdeı jasaý múmkin emes, muny túsinýlerińiz kerek. Josparlaý barysynda barlyq jaǵdaılar eskeriledi. Atap aıtsaq, aýyldyń bolashaǵy, jobanyń mańyzdylyǵy, shyǵyndar kólemi jan-jaqty qarastyrylady. Degenmen, sizderdiń aýdandaryńyzdy 2022 jyldyń sońyna deıin tolyǵymen gazdandyrý kózdelip otyr»,- dedi óńir basshysy Berdibek Saparbaev.
Aýdannyń áleýmettik-ekonomıkalyq damýynyń negizgi baǵyttaryna toqtalǵan Rústem Dáýlet barlyq salada oń dınamıka baıqalǵanyn atap ótti. Aıtalyq, ónerkásiptiń damýy 17,8 mıllıard teńge, aýyl sharýashylyǵy 66,2 mıllıard, ınvestıtsııalar 40,6 mıllıard, qurylys 22,7 mıllıard teńge paıda ákelgen.
Shaǵyn jáne orta bıznes boıynsha 12200 adam jumys isteıdi. Memlekettik baǵdarlamalar aıasynda 4634 qordaılyqqa, 17 seriktestikke jáne 62 sharýa qojalyǵyna 5,6 mıllıardtan astam teńgege nesıe berilgen.
«Bıznestiń jol kartasy – 2025» baǵdarlamasy aıasynda jalpy somasy 418,6 mıllıon teńgege 18 jobaǵa qoldaý kórsetilipti. 119,7 mıllıon teńge somasyndaǵy taǵy jeti joba «Qarapaıym zattar ekonomıkasy» baǵdarlamasy boıynsha nesıelendirilgen. «Alqaptan sórege deıin» jobasymen «Eco Chiken» óndiristik kooperatıvi qus fabrıkasyn ashý úshin 16,5 mıllıon teńgelik qoldaýǵa ıe bolǵan.
«Eńbek» baǵdarlamasy aıasynda ótken jyly 148 qordaılyqqa 616 mıllıon teńgege nesıe berildi. Taǵy 684 adam jalpy 369,7 mıllıon teńgege qaıtarymsyz granttarǵa ıe boldy», - dep atap ótti R. Dáýlet.
Aýyl turǵyndarynyń tabysyn arttyrý boıynsha pılottyq joba aıasynda Jambyl aýyldyq okrýgi turǵyndarynyń 252 ótinimi qaralyp, olarǵa 712,5 mıllıon teńge somasynda nesıe berildi. Nátıjesinde okrýgte jeke kásipkerler sany 168-den 419-ǵa deıin ósti. Qosymsha 139 jańa turaqty jumys orny ashyldy.
Ótken jyly aýdanda 49,5 myń sharshy metr turǵyn úı paıdalanýǵa berilse, aldyńǵy jylmen salystyrǵanda ósim 146,9 paıyzdy quraǵan. Sondaı-aq, 2022 jyldyń sońyna deıin tolyǵymen gazdandyrylady dep kózdelýde
«Bıyl Qordaı aýdanynda jalpy quny 4,5 mıllıard teńge bolatyn 60 páterli segiz kópqabatty úıdiń qurylysy bastalady. Olardyń altaýy kezekte turǵandarǵa, al ekeýi bıologııalyq qaýipsizdik problemalary boıynsha QazǴZI qyzmetkerlerine beriletin bolady», - deıdi Rústem Dáýlet.
«Sonymen qatar, Batys turǵyn alabynda taǵy bes kópqabatty 60 páterli úıdiń qurylysyna jobalyq-smetalyq qujattama daıyndaý úshin 49,5 mıllıon teńge bólindi. Bıýdjet Qordaı jáne Sortóbe aýyldarynda bıýdjettik qyzmetkerleri, az qamtylǵan jáne kóp balaly otbasylar úshin eki páterli jańa turǵyn úıler salynady», - dep atap ótti aýdan ákimi.
Al, turǵyndar búginde Qordaıdaǵy aýyldarda beıbitshilik pen kelisim ornaǵanyn, dúngender memlekettik tildi úırenip jatqanyn, jergilikti mektepterde qosymsha qazaq tilinde oqytatyn synyptar ashylǵanyn atap ótti.
«Aýylymyzdaǵy oń ózgeristerdi kórgende, marqaıyp qalamyz. Imamdar úıiniń ashylýy – dinı qyzmetker retinde men úshin asa mańyzdy oqıǵa boldy. Sonymen qatar, búginde kóptegen jańa mektepter paıdalanýǵa berilýde. Biz aýyl turǵyndaryna muǵalimderdi qurmetteı bilýge úıretetýdemiz», - dedi Sortóbe meshitiniń ımamy Gýbar Fansharov.
Masanchı aýylynyń qoǵamdyq keńesiniń tóraǵasy Ishar Loý ótken jyly qordaılyqtar jemisti juys jasady dep sanaıdy.
«Bizdiń aýdannyń áleýeti zor. Búkil álemdi dúr silkindirgen pandemııaǵa qaramastan, biz mańyzdy jetistikterge jete aldyq. Árıne, ótken jyldyń qaıǵyly oqıǵasyn eshkim esten shyǵarǵan joq. Aýdan turǵyndary oǵan ókinishpen qaraıdy jáne bolǵan oqıǵalardan sabaq aldy. Biz endi ondaı oqıǵanyń eshqashan qaıtalanbaıtynyna senimdimiz», - dedi ol.
Sondaı-aq, oblys ákimi kóshpeli qoǵamdyq qabyldaýlardyń tıimdiligin atap ótti.
«Bılik halyqqa jaqyndaı túsýde, bul atqarylyp jatqan jumystardyń sapasyn jáne sheshimder qabyldaýdyń jedeldigin aıtarlyqtaı arttyrady», - dep atap ótti Berdibek Saparbaev.
Sonymen qatar, ol pandemııanyń aýyr kezeńinde shekaradaǵy Qordaı aýdany vırýstyń shetelden ishke keń taralýyna jol bermeı, ózine júktelgen mindetti abyroımen atqarǵanyn atap ótti.
«Búgin men ekonomıkanyń qarqyndy ósýin, oǵan meılinshe rıza azamattardy kórip otyrmyn. Bizde odan ári de ilgerileý úshin bári jetkilikti, endi biz jańa máselelerdi sheshýge daıynbyz. Aýyz sýmen, elektrmen, gazben jáne jańa turǵyn úılermen qamtamasyz etý – 2021 jylǵa arnalǵan basym baǵyttardiń negizi. Sondaı-aq, aýyl sharýashylyǵy, ónerkásip jáne kásipkerlik salalaryn damytý jaıy da nazardan túspeýi tıis», - dep túıindedi oblys ákimi.
