«Qordaı» keden beketinen kún saıyn 350-ge jýyq júk tasymaldaýshy ótedi
ASTANA. 13 qazan. QazAqparat /Gúlmıra Alıakparova/ - «Qordaı» keden beketinen kún saıyn 350-ge jýyq júk tasymaldaýshy ótedi. Bul týraly búgin ótken baspasóz máslıhatynda QR Qarjy mınıstrligi Kedendik baqylaý komıteti Táýekelderdi taldaý jáne statıstıka basqarmasy bastyǵynyń orynbasary Aıan Kólbaı málim etti.
«Qordaı» keden beketinde kedendik shekara arqyly taýarlardy alyp ótýmen aınalysatyn tulǵalardyń sany 250-350 adamǵa jetedi», - deıdi A.Kólbaı.
Jeke tulǵalardyń jeke paıdalanýǵa arnalǵan taýarlardy Kedendik odaq shekarasy arqyly ótkizý jáne olardy shyǵarýǵa baılanysty kedendik operatsııalardy jasaý tártibi týraly kelisimge sáıkes, jeke paıdalanýǵa arnalǵan taýaralardy KO-nyń shekarasy arqyly ótkizý kezinde kedendik quny 1500 eýrodan, salmaǵy 50 keliden aspaıtyn taýarlar kedendik tólemderden bosatylady. Osy normany alǵa tartyp, adal emes kásipkerler kedendik bajdar men salyqtardan jaltarý maqsatynda, taýarlardy shekara arqyly ótkizý úshin azdaǵan aqsha tólep, adamdardy, ádette shekara mańyndaǵy eldi-meken turǵyndaryn jaldaıdy. Jaldanǵan tulǵalar taýarlardy bajsyz normadan aspaıtyn kólemde tıep, shekarany ortasha eseppen táýligine 8 retke deıin kesip ótedi.
«Sonymen, jaldanǵan tulǵalardyń sanyn, bir táýlik ishinde shekaradan ótý jıiligin jáne olarmen ótetin taýarlardyń salmaǵyn eskersek, kórsetilgen top jalpy salmaǵy 100 tonnadan astam taýardy kedendik shekara arqyly bajdar men salyqtardy tólemeı ótkizýge qabiletti. Mundaı áreketterden memleketke keletin zıyn aıqyn», - deıdi ol.
Onyń sózine qaraǵanda, osyǵan oraı, Qazaqstannyń Qarjy mınıstrligi ózge memlekettik organdarmen birlese otyryp jeke tulǵalardyń jeke paıdalanýǵa arnalǵan taýarlardy kedendik beketter arqyly alyp ótý kezinde táýekelder salasyn anyqtaý máselesin kóterip, bul problemanyń jolyn kesýge múmkindik beretin birqatar sanattardy bekitti.
Máselen, budan bylaı, júk tasymaldaýshylar kedendik bajdar men salyqtardy tóleýden bosatylǵan normany qoldanyp, taýarlardy shekara arqyly birneshe ret ótkize almaıdy. Sebebi ýaqyttyń belgilengen kezeńi ishinde taýarlardy qaıtadan ótkizgen kezde, taýarlar kommertsııalyq nemese kásipkerlik qyzmetke arnalǵandardyń sanatyna jatqyzylatyn bolady.
