«Qordaı» beketin keńeıtý qajet - Beıbit Atamqulov
Mınıstr aldymen «Qordaı» jáne «Qarasý» keden beketteriniń jumysymen tanysty. Jambyl oblysy ákiminiń birinshi orynbasary B. Orynbekov pen Qordaı aýdanynyń ákimi R. Dáýlet beketterdiń jaı-kúıin, ondaǵy jumystar týraly jan-jaqty habarlady.
B. Atamqulov aldymen «Qarasý» keden beketinde boldy. Munda shekarashylar kelýshilerge pýnkttiń qazirgi áleýeti men jumysy jaıynda málimet berdi. Bul rette aýdan ákimi R. Dáýlet «Qordaı» ótkizý beketiniń kúrdeli jóndeýge jabylýyna baılanysty bul beketke aıtarlyqtaı kúsh túskenin eskerip, aýdan ákimdigi tarapynan birqatar jaǵdaıdyń jasalǵanyn aıtty. Sonymen qatar adamdardy ózge pýnktterge tasymaldaý maqsatynda arnaıy kólikter uıymdastyrylǵanyn da málimdedi.
Mınıstr aldaǵy ýaqytta «Qarasý» keden beketin keńeıtý jumystary boıynsha shekarashylardyń usynystaryna qulaq túrip, onyń mańyzdylyǵyna toqtaldy.
«Bul beket eki el arasynda adamdar men kólik quraldary kóp ótetin pýnkterdiń biri bolǵandyqtan, halyq úshin barlyq jaǵdaılar jasalý qajet, ınternet jelisinen bastap, elektrondyq ótkizý qurylǵylary, beınebaqylaý júıesi, medıtsınalyq pýnkt, tipti qajet bolǵan jaǵdaıda shekarashylarǵa jataqhana salý máselesi de qurylys josparyna engizilýi kerek», -dep tıisti mekeme basshylaryna tapsyrma berdi.
Budan soń aǵymdaǵy jyldyń naýryz aıynan bastap kúrdeli jóndeý jumystary bastalǵan «Qordaı» ótkizý pýnktiniń qurylys barysymen tanysty. Búginde qurylys jumystary qyzý júrip jatqan nysannyń jaǵdaıyn bas merdiger baıandady. Mınıstr jańǵyrtý jumystary sapaly ári kelisilgen merzim ishinde aıaqtalý qajettigin basa aıtty.
Aıta ketý kerek, «Qordaı» ótkizý-baqylaý beketi Qazaqstan men Qyrǵyzstan elderi arasynda halyq pen kólik aǵyny eń kóp shekaralyq pýnkt bolyp sanalady. Táýligine birneshe myń adam men avtokólikter ótetin aımaqta jaz aılarynda jol júrýshi azamattar tipti kóbeıe túsedi. Sondyqtan osyndaı jaǵdaılardy eskerip, aýa jylytý jáne salqyndatý júıelerin mindetti túrde nazarǵa alý kerek», -dep atap ótti mınıstr.
