Kordaı aýdanyndaǵy tártipsizdikter kezinde qıraǵan turǵyn úıler qalpyna keltirilýde
TARAZ. QazAqparat – Oblys ákimi Berdibek Saparbaevtyń Qordaı aýdanyna jasaǵan jumys saparynyń ekinshi kúni aýyldardyń áleýmettik-ekonomıkalyq damýy men ınfraqurylymdyq jobalardy júzege asyrýǵa baǵyttaldy, dep habarlaıdy QazAqparat.
Aıta ketý kerek, buǵan deıin Qordaı aýdanynyń bıýdjeti shamamen 28 mıllıard teńgeni qurasa, bıyl bul kórsetkish eki esege deıin artqan. Osy oraıda memlekettik baǵdarlamalar sheńberindegi jobalardy júzege asyrýǵa qosymsha 20 mlrd. teńge baǵyttalsa, taǵy tórt mıllıard teńgeni 7 eldi mekendi gazdandyrýǵa jumsaý josparlanýda.
Búginde aqpan aıynda aýdanda oryn alǵan oqıǵalar kezinde buzylǵan turǵyn úıler men kommertsııalyq nysandardy qalpyna keltirý jumystary qyzý júrip jatyr. Qazirdiń ózinde jumysyn bastaǵan merdiger uıymdar barshylyq. Alaıda, kásipkerler Hýseın Súleımen, Abdýrashıd Bagıev jáne Ismar Lýtýr sııaqty keıbir turǵyndar úıler men dúkenderdi óz betimen qalpyna keltirýdi uıǵarǵan. Osylaısha, olar memleketten qarastyrylǵan qarajatty basqa maqsattarǵa jumsaý úshin shyǵyndardy ońtaılandyrýǵa yqpal etýde.
Oblys ákimimen áńgime barysynda olar kórsetilgen kómek pen qoldaýlar úshin el Prezıdenti men jergilikti bılikke alǵystaryn bildirdi. Memlekettik qoldaýmen qatar, jergilikti kásipkerler de kómek qolyn sozýǵa daıyn, qaıyrymdylyq qory da jumys isteýde.
Masanshynyń dál ortasyndaǵy jańa mektep qurylysy ótpeli nysan bolyp tabylady desek, bıyl ol boıynsha 550 mıllıon teńge ıgerilmek. Osynda ótken jergilikti turǵyndarmen kezdesýde aýyldyq okrýgi ardagerler keńesiniń tóraǵasy Dydar Dvýmarov sóz aldy.
- Biz buǵan deıin aýylda mundaı aýqymdy jumys atqarylǵanyn kórgen emespiz. Aýyl kóz aldymyzda ózgerip keledi. 41 kóshe jóndelýde, jańa mektep, sport alańy salynýda. Bul biz úshin tamasha tartý. Qazirgi tańda Shý aýdanynda 300-den astam otbasymyz jemis-jıdek pen kókónis egýmen aınalysýda. Osyndaı qamqorlyǵy úshin memleketke aıtap alǵysymyz mol, - dedi ardager.
Óz kezeginde aımaq basshysy dúngen dıasporasyna sý tasqyny saldarynan zardap shekken Maqtaaral turǵyndaryna qol ushyn sozyp, kórsetken ıgi isteri úshin alǵysyn jetkizdi. Jyl sońyna deıin Masanshy men kórshiles alty eldi mekenge gaz tartylmaq. Basqa máseleler de kezeń-kezeńimen sheshiletin bolady. Eń bastysy, Qordaı jerinde beıbitshilik pen tynyshtyq ornaýy kerek.
Sondaı-aq, aýylda shaǵyn-fýtbol alańshasy, kóshe trenajerlary men balalar alańynan turatyn kópfýnktsıonaldy sport alańy salynýda. Masanshy aýyldyq okrýgine Kúnbatys-1 jáne Kúnbatys-2 shaǵyn aýyldary da kiredi. Kúnbatys-1e eldi mekeninde bar-joǵy 200-den astam adam turady. Óńir basshysy ondaǵy quny 26 mıllıon teńgeni quraıtyn medıtsýınalyq pýnktiń qurylysymen tanysty.
Qarakemer aýylynda sport alańy men dárigerlik ambýlatorııa, aýyz sý tartý jobasy júzege asyrylýda . Munda 11 kóshege asfalt tóseý, alty kósheni jaryqtandyrý jumystary júrgizilýde. Qonaev kóshesiniń boıynda kezekke turǵandarǵa arnalyp Qonaev kóshesinen ekipáterli 10 úıdiń qurylysy júrip jatyr. Al, Aýqatty aýyldyq okrýginde 19 kósheniń jáne №9 orta mekteptiń kúrdeli jóndeý jumystary bastalǵan. Sonymen qatar aýdan 7,4 shaqyrym bolatyn «Aýqatty-Báıterek» avtojoly qurylysy salynýda.
«Búgingi tańda búkil el Qordaı aýdanyna, buzylǵan qurylymdardy qalpyna jedel keltirý jáne eń bastysy ishki jaǵdaıdyń turaqtanǵandyǵyna den qoıyp otyr. Qazir biz barlyq qıyndyqtardy eńserdik, mundaǵy tirshilik óz qalybyna tústi dep senimmen aıta alamyz», - dedi oblys ákimi Berdibek Saparbaev aýdan aktıvimen bolǵan kezdesýde.
