Qordaı aýdanyndaǵy 10 aýylǵa gaz kirdi
Memleket basshysynyń tapsyrmasymen «QazTransGaz» AQ Ulttyq operatory Jambyl oblysynyń ákimdigimen birlesip Aýqatty, Bular batyr, Sortóbe, Masanchı, Qarakemer, Qarasý, Ótegen, Qyzylsaı, Kúnbatys-1 jáne Kúnbatys-2 aýyldaryna gaz qubyryn tartty.
Barlyǵy 392 km gaz qubyry tartylǵan. Bul 62 myńnan astam turǵyn men 274 áleýmettik jáne kásipkerlik nysanynyń tabıǵı gazben qamtylýyna múmkindik berip otyr. Ol boıynsha tıisti jumys qysqa merzimde – maýsym aıynda bastalyp qazan aıynda aıaqtaldy.
«70 jyldan astam ýaqyttan beri Qordaıǵa gaz tartý máselesi sheshilmeı kelgen edi. Osy turǵydan alǵanda bıylǵy jyldy – tarıhı jyl dep ataýǵa bolady. El Prezıdentiniń qoldaýynyń arqasynda aýdannyń 100 myńǵa jýyq turǵyny turatyn 22 aýyldy gazdandyrýǵa 10 mıllıardtan astam teńge baǵyttaldy. Nátıjesinde, qordaılyqtardyń «kógildir» otynmen qamtylý kórsetkishi 47-den 95 paıyzǵa deıin artpaq. Mundaı aýqymdy jumys buryn-sońdy munda bolmaǵan», - dep atap ótti aımaq basshysy Berdibek Saparbaev.
Aýdandyq qoǵamdyq kelisim keńesiniń tóraǵasy Ábdibek Seıilhanov ta jerlesterin qýanyshty oqıǵamen quttyqtady.
«Ózderińiz biletindeı, osy jyldyń basynda Memleket basshysy aýdanymyzǵa arnaıy kelgen bolatyn. Sol kezde biz, Qordaı aýdanyń turǵyndary, Prezıdentten birqatar máseleni sheshýge, onyń ishinde gazdandyrýǵa qatysty kómektesýin suradyq. Mine, bizdiń ótinishimiz nazardan tys qalmady. Biz osy sharaǵa atsalysqandardyń barlyǵyna rızashylyǵymyzdy bildiremiz. Biz úshin bul naǵyz merekege aınalyp otyr. Osyny sebep etip dúngen baýyrlarymyzben taǵy da júzdesip, ortaq mańyzdy nárselerdi saralap, bir-birimizdi quttyqtap jatyrmyz. Biz úshin eń bastysy – birlik!», - dep atap ótti Á.Seıilhanov.
Aýyldyqtardy qýanyshty sátimen quttyqtaı otyryp, gaz mamandary turǵyndarǵa qaýipsizdik erejesi jazylǵan jadynama taratty.
«Gaz – bul ıgilik, degenmen ony paıdalaný kezinde qaýipsizdik sharalaryn saqtaýdy birinshi nazarda ustaý kerek»,- deıdi gaz qyzmetkerleri.
Budan soń oblys ákimi osy kúni basqalarmen qatar úıine gaz kirgen jergilikti turǵyn Musa Mashanlonyń shańyraǵyna bas suqty.
«Bul oqıǵanyń bizge qanshalyqty qolaılylyq týǵyzyp otyrǵanyn aıtyp jetkize almaımyz. Solardyń eń bastysy –jylý men tazalyq. Buǵan deıin ár qys saıyn jeti-segiz tonna kómir satyp alyp, ony eki-úsh saǵat saıyn peshke salyp otyrýǵa májbúr edik. Al keıde sapasyz kómirge tap bolyp qalsaq, qys boıy qınalatynbyz. Bárinen buryn as úıden shyqpaıtyn jubaıym men kelinim qatty qýanýda», - dedi Musa Mashanlo qýanyshymen bólisip.
Gaz qubyryn tartý qurylysy «Qordaı» avtomatty gaz taratý stansasyn (AGTS) qaıta qurý jáne onyń ótkizý qýattylǵyn arttyrýmen qatar júrgizildi. Atalǵan stansany qaıta qurý jumysy Qordaı aýdanynyń taǵy 12 eldi mekenine gaz tartý isin josparlaýǵa múmkindik beredi.
