Qordaı asýynyń jańa joly aralyqty 17 shaqyrymǵa qysqartty

TARAZ. QazAqparat - «Qordaı asýyn aınalyp ótý» ýchaskesiniń 162-260 shaqyrym aralyǵyndaǵy jalpy uzaqtyǵy 80 shaqyrymdy quraıtyn jańa joldyń ekinshi jaǵy saltanatty túrde ashyldy, dep habarlaıdy QazAqparat QR IDM baspasóz qyzmetine silteme jasap. 

Shara barysynda Jambyl oblysy ákiminiń birinshi orynbasary Bekbolat Orynbekov qurmetti qonaqtar men aýdan turǵyndaryn quttyqtap, qaıta qurý jobasyna atsalysqandarǵa alǵysyn bildirdi. Іs-shara aıasynda merekelik kontsert uıymdastyryldy.

«Jańa baǵyttaǵy Qordaı asýynyń aınalma joly Jambyl oblysynyń Qordaı aýdanynyń aýmaǵymen barlyq aýyldyń ishine krimeı syrtynan aınalyp ótedi. Búgingi kúnge deıin paıdalanylyp kelgen joly Sarybulaq, Betqaınar, Qordaı, Alǵa eldi mekenderiniń ishimen ótip, jalpy uzaqtyǵy 100 shaqyrym bolsa, jańadan  І-b sanatynda salynǵan jol 20 shaqyrymǵa qysqarǵan. Qazir 80 shaqyrymdyq jol aýyldardy syrtynan ótedi. Osylaısha, jol júrý ýaqyty da qysqartylyp otyr», - delingen habarlamada.

Sondaı-aq, Qordaı asýynyń uzaqtyǵy 17 shaqyrymǵa (60%) qysqardy. Qoldanystaǵy asýdyń uzaqtyǵy 27 shaqyrym bolsa, jańa І-tehnıkalyq sanattaǵy joldaǵy asýdyń uzaqtyǵy 10 shaqyrym bolyp qaldy.

Budan basqa, bıyl «Batys Eýropa - Batys Qytaı» halyqaralyq tranzıt dálizine Qordaı ótkeliniń aınalmaly ýchaskesiniń jalǵasy bolyp tabylatyn «Otar-Uzynaǵash» jobasy qolǵa alyndy. Joba 2018-2021 jyldary iske asyrylady.

Joba qurylysynyń ІІ kezeńin «Qazaqjolqurylysy» JShS merdigerlik uıymy júrgizdi.

Birinshi  kezekte 40 shaqyrym jol 2015-2017 jyldar aralyǵynda respýblıkalyq bıýdjetten bólingen 8,527 mlrd teńgege salyndy. Tapsyrys berýshi «Jambyljolzerthanasy» RMM.

Ekinshi kezektegi 40 shaqyrym jol 2017-2018 jyldary respýblıkalyq bıýdjetten bólingen 9,240 mlrd teńgege salyndy. Tapsyrys berýshi «QazAvtoJol» UK» AQ JOF.

Jobaǵa 400-den astam jumysshy jáne 200 jol-qurylys tehnıkasy jumyldyryldy. Jobada 2 shaǵyn Jol polıtsııa beketi, 1 Jol-patrýl qyzmet beketi, 1 aýylsharýashylyq tehnıka ótkeli qarastyrylǵan.