Qorda 103,4 mlrd teńge bar: qaıtarylǵan aktıvter qalaı jumsalady
ASTANA. KAZINFORM – 2025 jyldyń 27 maýsymynda Arnaýly memlekettik qorda jınaqtalǵan aqsha 103,4 mlrd teńgege jetti. Bul týraly Qarjy mınıstrliginiń baspasóz qyzmeti habarlady.
Qazaqstannan zańsyz jolmen shyǵarylǵan aktıvterdi memleket menshigine qaıtarý maqsatynda 2023 jyldyń 12 shildesinde «Zańsyz ıemdenilgen aktıvterdi memleketke qaıtarý týraly» zań qabyldandy. Onyń erejelerin iske asyrý úshin basqarýshy kompanııa — «Qaıtarylǵan aktıvterdi basqarý kompanııasy» JShS qurylyp, oǵan memlekettiń enshisindegi aktıvterdi qabyldaý, saqtaý jáne satý mindetteri júkteldi.
— Atalǵan qarajat Arnaýly memlekettik qorǵa tikeleı aýdarylady. Qalǵan aktıvter (jyljymaıtyn múlik, kólik jáne t. b.) QABK basqarýyna ótip, satýǵa qoıylady. 2025 jyldyń 27 maýsymynda Arnaýly memlekettik qorda jınaqtalǵan aqsha 103,4 mlrd teńgege jetti. Bul rette jıyntyq túsimderdiń kólemi 433,3 mlrd teńgege, al shyǵystardyń somasy 329,9 mlrd teńgege artqan, — delingen habarlamada.
QABK qazirdiń ózinde 34 mlrd teńge somaǵa 48 aktıvti satty. Aktıv ornalasqan eldiń zańnamasyna sáıkes shetelde múlikti satýdy qosa alǵanda, tıisti jumys jalǵasyp jatyr. Tarıhı-mádenı mańyzy bar qundy nysandar (erte temir dáýiri men orta ǵasyrlardaǵy jádigerler) ǵylymı zertteýler úshin Ulttyq mýzeıdiń turaqty kollektsııasyna berildi.
— Jalpy somasy 318,1 mlrd teńge bolatyn Arnaýly memlekettik qordyń qarajaty 406 áleýmettik mańyzdaǵy jobany qarjylandyrýǵa baǵyttalady. Qarjylandyrýdyń negizgi kólemi sýmen jabdyqtaý (160,6 mlrd teńgege 230 joba) jáne densaýlyq saqtaý salasyna (100,4 mlrd teńgege 162 joba) jumsaldy. Sondaı-aq bilim berý (24 mlrd teńgege 10 joba) men sport salasyndaǵy (33,1 mlrd teńgege 4 joba) jobalardy da qarjylandyrý josparlanǵan.
2025 jyldyń 13 maýsymynda ótkizilgen Respýblıkalyq bıýdjet komıssııasynyń otyrysynda 80 mlrd teńgeden astam somaǵa 73 jobany qarjylandyrý maquldandy. Onyń ishinde Ónerkásip jáne qurylys mınıstrliginiń baǵytyna baılanysty, atap aıtqanda 63 joba elimizdiń qalalary men aýyldy eldi mekenderindegi sýmen jabdyqtaý júıelerin damytýǵa baǵyttaldy. Tek Abaı, Aqmola, Jambyl, Qostanaı, Soltústik Qazaqstan jáne basqa oblystardyń aýyldy jerlerinde 50-den astam nysan jańǵyrtylatyn bolady. Budan basqa Sý resýrstary jáne ırrıgatsııa mınıstrliginiń Túrkistan, Aqmola, Atyraý, BQO jáne SQO-da 30 mlrd teńgege jýyq qarajatqa toptyq sý qubyrlaryn salý men jańartýǵa qatysty 8 jobasyn iske asyrýǵa qarjylaı qoldaý kórsetiledi. Sonymen qatar Qostanaı oblysynda Ǵylym jáne joǵary bilim mınıstrliginiń 1 jobasy (Arqalyqtaǵy ınfraqurylymdy damytýǵa arnalǵan ǵımaratty 1,9 mlrd teńgeden astam somaǵa jańǵyrtý) men Týrızm jáne sport mınıstrliginiń 1 jobasy (Kókshetaý qalasynda 12,6 mlrd teńgeden astam somaǵa kópfýnktsıonaldy keshen salý) qoldaý tapty, — delingen habarlamada.
Túıindeıtin bolsaq, bul baǵytta halyqtyń ómirin jaqsartatyn jobalarǵa basymdyq beriledi.
Aıta ketelik úsh jylda 1 trıllıon teńgeden astam qarjy qaıtaryldy.