Qorada kómip tastaǵan: Qaraǵandyda joǵalǵan er adamnyń máıiti tabyldy
Qaraǵandy qalasynyń 33 jastaǵy turǵyny 15 shildeden bastap izdeýde bolǵan.
Іzdestirý sharalary úsh aıǵa jýyq ýaqyt júrgizildi. Oǵan polıtsııa qyzmetkerleri, joǵalǵan azamattyń jaqyndary, eriktiler jumyldyryldy.
Polıtseıler barlyq kúsh-quraldardy jumyldyryp, onyń jaqyndary men tanystary boıynsha da aqparattar jınady.
«Júrgizilgen jedel-izdestirý is-sharalary men tergeý áreketteri barysynda krımınaldyq polıtsııa qyzmetkerleri joǵalǵan azamatty óltirdi degen kúdikpen 38 jastaǵy qala turǵynyn ustady. Onyń aıtýynsha, jábirlenýshimen sózge kelispeı qalyp, oǵan dene jaraqattaryn keltirgen. Qylmysyn jasyrý maqsatynda máıitti jer úılerdiń biriniń qorasynda kómip tastaǵan», - dep habarlady Qaraǵandy oblystyq Polıtsııa departamenti bastyǵynyń orynbasary Ábil Ábildın.
Qazirgi ýaqytta atalǵan derek boıynsha QR Qylmystyq kodeksiniń 99-babyna sáıkes qylmystyq is qozǵalyp, tergeý amaldary júrgizilip jatyr. Kúdikti ýaqytsha ustaý ızolıatoryna qamaldy.
