Qora salý úshin 33 qaraǵaı kesip alǵan adam jaýapkershilikke tartyldy
ÓSKEMEN. QazAqparat – Shyǵys Qazaqstan oblysynyń turǵyny qora salý úshin ormannan 33 qaraǵaıdy kesip alǵan, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, 11 qyrkúıekte Begen ormanynda jergilikti polıtsııa qyzmetiniń tabıǵat qorǵaý polıtsııasy ınspektorlary 33 qaraǵaıdyń zańsyz kesilgenin anyqtady. Osynyń saldarynan orman qoryna 70 myń teńgeden astam shyǵyn keltirilgen.
«Tártip saqshylary oqıǵa ornyn tekserý barysynda aǵashtardy kesken Besqaraǵaı aýdanynyń turǵynyn ustady. Ol kinásin moıyndap, kesilgen aǵashpen qora salýdy josparlap otyrǵandyǵyn aıtty», - deıdi ShQO Polıtsııa departamentiniń bastyǵy Saǵat Mádıev.
Atalǵan fakt boıynsha QR Ákimshilik quqyq buzýshylyq týraly kodeksiniń 381-baby, 1-bóligi boıynsha ákimshilik hattama toltyrylyp, sot qaraýyna jiberildi.
Osy rette, oblystyq Polıtsııa departamenti turǵyndarǵa orman aýmaǵynan aǵash jınaý úshin «Semeı ormany» memlekettik orman tabıǵı rezervatynan tıisti ruqsat alý kerektigin eske salady.
