Qor naryǵynda jeke ınvestorlar 203 myńǵa deıin ulǵaıdy
«Sońǵy bes jylda qor naryǵyn kapıtaldandyrý 47,3 trln teńgege jetip, úsh eseden astyn. Bul JІÓ-niń 61%-yn quraıdy. 2021 jyly qor naryǵy ınfraqurylymyn jańǵyrtý nátıjesinde MSCI jáne FTSE Russel halyqaralyq ındeksterinde Qazaqstan Emerging Markets MSCI sanaty úshin negizgi sapalyq ólshemsharttarǵa jáne Secondary Emerging Markets FTSE Russel krıterıılerine tolyq sáıkes keldi», - dedi M. Ábilqasymova Qazaqstan qarjygerleriniń IX Kongresinde.
Onyń aıtýynsha, qor naryǵyndaǵy basty protsess jeke ınvestorlar belsendiliginiń artýy boldy. 2020 jyly qashyqtan ıdentıfıkatsııalaýdy engizý arqyly qor naryǵynda jeke tulǵalardyń sany 203 myńǵa deıin ulǵaıdy.
«2021 jyly bankterge brokerlik qyzmetterdiń tolyq aıasyn usyný quqyǵyn bere otyryp, biz osy segmentte odan ári ósýdi kútemiz. Jeke ınvestorlar sanynyń artýymen birge biz olardyń quqyqtary men múddelerin qorǵaý tetikterin jaqsartý qajettiligine tap boldyq. Osyǵan baılanysty retteý aıasyna qarjy deldaldary engiziledi. Investıtsııalyq usynymdardyń sapasy úshin jaýapkershilik aıqyndaldy, ınvestorlardyń táýekel beıinin aıqyndaý boıynsha tásilder ózgertildi», - dedi spıker.
M. Ábilqasymova ujymdyq ınvestıtsııalardy retteý bóliginde bırjaǵa táýekeldi ınvestıtsııalaý qorlaryn jiberýge shekteýler alynǵanyn atap ótti. Qabyldanǵan sharalar ınvestıtsııalyq qorlar aktıvteriniń jyl basynan beri 47%-ǵa 627 mlrd teńgege deıin ósýine alyp keldi.
«Jańa emıtentterdiń naryqqa shyǵýyn yntalandyrý úshin ruqsat berý rásimderin ońtaılandyrý jáne qysqartý arqyly olardyń qoljetimdiligi jeńildetildi. Jeke ornalastyrýǵa arnalǵan oblıgatsııalardy, ınvestıtsııalyq oblıgatsııalardy, klırıngtik qatysý sertıfıkattaryn qosa alǵanda, qazaqstandyq emıtentter úshin qoljetimdi qarjy quraldarynyń jelisi keńeıtildi», - dedi M. Ábilqasymova.
