Kópultty jáne kópkonfessııaly qoǵam - Qazaqstan men Sıngapýrdyń utymdy tusy – QR Prezıdenti
ASTANA. KAZINFORM - Qazaqstan Prezıdenti bıyl qyrkúıek aıynda ótetin BUU-nyń Keleshek sammıti qarsańynda álemdik qoǵamdastyqty ózara keńesý jáne ınklıýzıvtilik qaǵıdattaryna negizdelgen kópjaqty ustanym týraly oılanýǵa úndedi.
Bul týraly Qasym-Jomart Toqaev 46-shy Sıngapýr lektsııasynda aıtty.
– Qazaqstan kópjaqty ustanymǵa beıil ekenin bildirýge qashanda ázir. Bıyl biz Shanhaı yntymaqtastyq uıymy, Túrki memleketteri uıymy, Azııadaǵy ózara is-qımyl jáne senim sharalary jónindegi keńes, Ujymdyq qaýipsizdik týraly shart uıymy, Azyq-túlik qaýipsizdik jónindegi Islam uıymy jáne Halyqaralyq Araldy qutqarý qory sekildi alty halyqaralyq qurylymǵa tóraǵalyq etemiz. Jahandyq basqarý júıesiniń osal tustary aıdaı anyq, ol eshkimge qupııa emes. SOVID-19 pandemııasy elderdiń ortaq problemany eńserý úshin «qabyrǵa turǵyzbaı, kópir salýy» qajet ekenin kórsetti. Osy túıtkilderdiń ishindegi eń qorqynyshtysy – ıadrolyq qater. Qazaqstan – ıadrolyq qarýdan ábden zardap shekken el. Osy sebepti biz ıadrolyq qarýdan ada álem úshin kúresimizdi toqtatpaımyz, – dedi Prezıdent.
Qasym-Jomart Toqaevtyń pikirinshe, kópultty jáne kópkonfessııaly qoǵam Qazaqstan men Sıngapýrdyń utymdy tusy sanalady.
– Byltyr qyrkúıek aıynda «The Jerusalem Post» basylymynda «Dinder kóshbasshylary búkil álemde beıbitshilik ornaýyna yqpal ete alady» degen maqalam jaryq kórdi. Beıbitshilik mádenıeti tek birligimiz áralýandyqta jáne ózara qurmet qaǵıdalaryna ǵana negizdele alady. Bul rette Qazaqstan bastamasymen uıymdastyrylatyn Álemdik jáne dástúrli dinder kóshbasshylarynyń sezi dıalogty damytý jáne ortaq qundylyqtardy nasıhattaý úshin biregeı alańǵa aınaldy. Biz Sıngapýrdyń Birligi jarasqan qoǵam halyqaralyq konferentsııasyn ótkizý jónindegi bastamasyn (ICCS) quptaımyz. 2022 jyly sáýir aıynda men Medıatıvti kelisimder týraly Sıngapýr konventsııasyn ratıfıkatsııalaǵan Zańǵa qol qoıdym. Bul transshekaralyq moıyndaý protsesiniń tıimdiligin arttyrady jáne bitimgerlik retteý týraly kelisimniń oryndalýyn qamtamasyz etedi, – dedi Prezıdent.
