Kópten kútken joba: Qaraǵandynyń eki iri aýdanyn tikeleı jalǵaıtyn jańa jol salynady
QARAǴANDY. KAZINFORM — Qaraǵandyda eki iri turǵyn aýdan — Ońtústik-Shyǵys pen Maıqudyqty baılanystyratyn jańa magıstraldiń qurylysy bastaldy. Bul joba qaladaǵy kólik aǵynyn azaıtyp, ortalyq kóshelerdegi júktemeni tómendetýge jáne jol qatynasyn jaqsartýǵa múmkindik beredi.
Joldyń uzyndyǵy shamamen 6 shaqyrym. Qozǵalysty tıimdi etý úshin magıstral tórt jolaqty bolady — ár baǵytqa eki jolaqtan. Jol Muqanov kóshesinen bastalyp, qarqyndy damyp jatqan Ońtústik-Shyǵys sektoryn kesip ótip, Maıqudyqtyń Shyǵys aınalma tas jolyna jalǵanady.
Bıyl Muqanov kóshesinen «Dınastııa» turǵyn úı keshenine deıingi aralyq salynady. Joba aıasynda trotýarlar, kógaldandyrý aýmaqtary men avtoturaq oryndary qarastyrylǵan. Qurylys tolyqtaı 2027 jylǵa deıin aıaqtalady dep josparlanyp otyr.
Sonymen qatar qalada basqa da jol nysandaryn jańartý jumystary jalǵasyp jatyr. Bóketov kóshesinde asfalt tóselip, sýaǵar júıeleri men jaryq shamdary ornatyldy. Bul jobany jyl sońyna deıin aıaqtaý kózdelgen.
Qalanyń negizgi joldarynyń biri — Nazarbaev dańǵylynda da jóndeý jumystary júrip jatyr. Bul kóshede sońǵy ret kúrdeli jóndeý shamamen 15 jyl buryn júrgizilgen. Bıyl ortasha jóndeý qolǵa alynyp, sonymen qatar jaıaý júrginshiler aımaǵy abattandyrylyp jatyr. Eski, buzylǵan tas tósenishtiń ornyna granıt tóselip jatyr. Qazirgi kezeńde jol jabyny men trotýarlar jóndelip jatyr, al kelesi jyly ortalyq jaıaý júrginshiler aımaǵyn jańartý josparlanǵan.
Osyǵan deıin Qaraǵandynyń atyshýly aýdany Maıqudyq 20 jylda qalaı ózgergeni jaıly jazǵan bolatynbyz.