Kópten kútken «Merki-Shý-Býrylbaıtal» jolyn jańǵyrtý jumystary mamyrda bastalady
TARAZ. QazAqparat - Jambyl oblysynda Merki-Shý-Býrylbaıtal baǵytyndaǵy respýblıkalyq mańyzdaǵy jol qaıta jańǵyrtylady. Kópten beri ózekti máselege aınalyp kelgen jóndeý jumystary aǵymdaǵy jyldyń mamyr aıynda bastalmaq, dep habarlaıdy QazAqparat.
Oblystyq jolaýshylar kóligi, avtomobıl joldary basqarmasy mamandarynyń aıtýynsha, alǵashqy kezeńde 266 shaqyrym joldyń 25 paıyzy tóseledi. Al tolyǵymen 4 jyl ishinde aıaqtaý josparlanýda eken. Qazir jol túsetin aýmaqtaǵy jer telimderi memleketke qaıtarylyp jatyr.
«Bul joba tehnıkalyq ekonomıkalyq negizdemege sáıkes 101 mıllıard teńgeni qurap otyr, onyń Merkiden Shýǵa deıingi aralyǵy 1-sanattaǵy jol bolady. Ári qaraı Shý qalasyn aınalmaly joly odan Birlik, Birlikten Býrylbaıtal jolyna deıin 2-sanattaǵy jolǵa jatatyn bolady»-deıdi oblystyq jolaýshylar kóligi jáne avtomobıl joldary basqarmasynyń basshysy Baqytjan Jánibekov.
Aıta keteıik, jalpy bıyl oblysta 430 shaqyrymnan astam jol jóndeledi. Ásirese, oblystyq jáne aýdandyq mańyzdaǵy aýylaralyq joldarǵa mán berilmek. Eldi mekenderdegi kósheler men avtojoldardy jańǵyrtý, kúrdeli jáne orta jóndeýden ótkizýge jergilikti bıýdjetten 11 mıllıard teńgeden astam qarjy qarastyrylǵan.
