Kópten kútken «Qazaq eli» mýltfılmin eń birinshi balalar úıiniń tárbıelenýshileri tamashalady
ASTANA. QazAqparat - Búgin «Kinopark 8 3D» kınoteatrynda Qazaq handyǵynyń qurylýynyń 550 jyldyǵyna arnalǵan «Qazaq eli» atty qazaq mýltıplıkatsııasy tarıhyndaǵy tuńǵysh tarıhı tolyqmetrajdy anımatsııalyq fılminiń tusaýkeseri ótti.
Týyndynyń alǵashqy kórermenderi Astana qalasynyń balalar úıi men az qamtylǵan otbasylardyń balalary boldy.
Óziniń mańyzdylyǵy jaǵynan aıryqsha «Qazaq eli» anımatsııalyq fılmi bolashaq handar Jánibek pen Kereıdiń balalyq shaǵy men eseıý jyldary týraly baıandaıdy. Kartınada bas keıipkerlerdiń shaıqastyń aıla-tásilderin, ǵylymdy qalaı meńgergenderi jáne bostandyq pen táýelsizdik úshin kúres jolynda qazaq eliniń basyn qalaı biriktirgendigi jaıly áńgimelenedi. Mýltfılmniń kadrlarynda shetsiz-sheksiz qazaq dalasy, zańǵar taýlar jáne Syǵanaq, Otyrar, Taraz jáne Túrkistan sekildi ejelgi qalalar beınelengen.
Jobaǵa tanymal otandyq ǵalymdar men jazýshylar atsalysqandyqtan, fılm tarıhı faktilermen órilip, balalarǵa túsinikti tilde jeńil ári qyzyqty oqıǵalar arqyly qamtylyp kórsetiledi. Anımatsııalyq fılmniń bas keńesshisi Arystanbek Muhamedıuly, tarıh ǵalymdarynyń doktory, professor Jambyl Artyqbaı jáne jazýshy, kınodramatýrg Dýlat Isabekov. Bas keıipkerlerdi Ǵ. Músirepov atyndaǵy Qazaq Memlekettik akademııalyq balalar jáne jasóspirimder teatrynyń, sondaı-aq, J. Shanın atyndaǵy Ońtústik Qazaqstan oblystyq qazaq drama teatrynyń ártisteri dybystady. Fılmniń saýndtrekterin Nurlan Abdýllın, Sáken Maıǵazıev syndy basqa da tanymal qazaqstandyq ánshiler oryndady.
Rejısseri Batyrhan Dáýrenbekov, stsenarıin jazǵan Saǵadildá Úsipbálıev, Baqytjan Quljabaı, kompozıtory Rýslan Shynyqulov, qoıýshy sýretshisi Azamat Ernazarov, bas prodıýseri Sábıt Ábdiqalyqov, dırektory Nýrıddın Patteev.
Kartınanyń jasalýynda 2-D jáne 3D-tehnologııalar paıdalanylǵan. Bul fılm barysyndaǵy qazaq jeriniń ásem tabıǵatyn, sol zamandaǵy Jibek joly boıynda ornalasqan Saýran, Otyrar, Syǵanaq sııaqty iri qalalar, záýlim han saraılarynyń kórkemdigin kórsetýge múmkindik berdi. Sonymen birge, kishkentaı kórermenderimiz elordamyz Astananyń búgingi kóz súısindirer kórkin de tamashalaı alady. Fılm kórkem týyndy bolǵandyqtan tarıhı faktilerge súıene otyryp balalarǵa túsinikti tilde jeńil ári qyzyqty oqıǵalar arqyly qamtylyp kórsetiledi. 3D-anımatsııa men qazaq folklorynyń úılesýi jobanyń biregeıligimen erekshelenedi. Jobaǵa 60-tan asa adam jumyldyryldy. Týyndynyń bas prodıýseri Sábıt Ábdiqalyqovtiń pikirinshe, qazaqstandyq ártister tarıhı tulǵalarǵa tán beıneni dúnıege ákelý úshin aıanbaı eńbek etken.
«Qazaq eli» atty tuńǵysh tarıhı anımatsııalyq fılmi jalpyulttyq prokatqa 19 mamyrdan bastap shyǵady.
