Kóptegen pyshaq jaraqatyn salǵan: Almatyda taksı júrgizýshisine shabýyl jasaldy
Almaty qalalyq polıtsııa departamentiniń málimetinshe, aýyr qylmys eki apta buryn Túrksib aýdanynda oryn alǵan.
«Úsh er adam bıznes sanattaǵy taksıge tapsyrys berip, júrgizýshiden olardy áýejaıǵa jetkizip tastaýyn suraǵan. Alaıda jolda jolaýshylar taksı júrgizýshisine shabýyl jasap, oǵan kóptegen pyshaq jaraqatyn salǵan. Qaskóıler Toyota Camry kóligin ıemdengen.
Atalǵan qylmysty ashý maqsatynda jedel-izdestirý toby qurylyp, onyń quramyna krımınaldyq polıtsııa jáne Túrksib aýdandyq polıtsııa basqarmasynyń qyzmetkerleri kirdi. Kúdiktiler dereý anyqtaldy. Olar jasyrynýǵa tyrysqan.
Qazir kúdiktiler ustalyp, qamaýǵa alyndy. Ózgeniń kóligin jeke paıdalaryna asyryp úlgermedi. Sheteldik kólik ıesine qaıtaryldy», – dedi Almaty qalalyq polıtsııa departamenti bastyǵynyń orynbasary Berik Ábilbekov.
Qazir ustalǵandardyń basqa da qylmystarǵa qatysy bar-joǵy tekserilýde. Olar – 1993, 1998 jáne 2000 jyly týǵan Almaty oblysy Talǵar aýdanynyń turǵyndary.
«Maǵan shabýyl jasaǵan adamdardyń ustalǵany týraly habarlaǵanda, shynymdy aıtsam, men qatty qýandym. Polıtsııa qyzmetkerlerine kásibı qyzmeti úshin alǵys aıtamyn», — dedi qaraqshylardyń qolynan japa shekken almatylyq.