Kóptegen pýnkt kelisildi — Tramp Reseı-Ýkraına kelissózi jaıly
ASTANA. KAZINFORM — AQSh prezıdenti Donald Tramp Truth Social platformasynda Reseı men Ýkraına arasyndaǵy kelissózderdegi jetistikter týraly habarlady, dep jazady BBC.
Tramp eki el ókilderimen ótken kezdesýler men kelissózderdiń sátti bolǵanyn aıtty.
— Reseı men Ýkraınamen kelissózder jáne kezdesýler úshin jaqsy kún boldy. Olar mámilege óte jaqyn, endi eki jaq joǵary deńgeıde kezdesý ótkizip, «bul máseleni aıaqtaýy» kerek. Negizgi tarmaqtardyń kópshiligi kelisildi. Qantógýdi DÁL QAZІR TOQTATYŃYZDAR. Biz bul qatygez jáne maǵynasyz soǵystyń AıAQTALÝYNA kómektesý úshin qajet bolǵan jerge baramyz, — dep jazdy Donald Tramp.
Buǵan deıin ol óz jazbasynda Ýkraınany mańyzdy ekijaqty kelisimdi keshiktirip jatqany úshin synǵa alǵan edi.
— Vladımır Zelenskıı basqaratyn Ýkraına AQSh-pen sırek kezdesetin jer elementteri týraly óte mańyzdy kelisimniń túpkilikti qujattaryna qol qoıǵan joq. Bul kem degende úsh aptaǵa keshikti. Qujatqa dereý qol qoıylady dep úmittenemin, — dedi Tramp.
Osyǵan deıin AQSh prezıdenti Donald Tramp ótken jeksenbi kúni Reseı men Ýkraına bitimgershilik kelisimge «osy aptada» qol jetkize alatynyn aıtty.