Kóptegen protsestik áreketter áli kúnge deıin qolmen jasalady - Balaıym Kesebaeva
«Búgin biz atqarýshylyq is júrgizýde taraptardyń quqyqtaryn qorǵaýdy qamtamasyz etý salasyndaǵy ózekti máselelermen, sondaı-aq olardy sheshý joldarymen tanysyp óttik. Osy baǵytta, elde atqarýshylyq is júrgizý júıesin tıimdi reformalaý boıynsha júrgizilip jatqan jumystyń óte mańyzdy ekenin erekshe atap ótkim keledi. Alaıda, bul jumystardy sot tóreligine júgingen adamdardyń quqyqtary men múddeleriniń buzylýyna alyp keletin barlyq problemalar sheshilgenge deıin jalǵastyrý qajet», - dedi ol Májilistegi Úkimet saǵatynda.
Onyń atap ótýinshe, atqarýshylyq is júrgizýdiń aqparattyq júıesin tsıfrlandyrý jáne damytý máselelerinde eleýli ilgerileý bar. Mysaly, uzaq ýaqyt boıy tyıym salýlardy almaý, boryshtardy tólemeý, elden shyǵýǵa shekteýlerdi alyp tastamaý sııaqty kóptegen problemalar sheshildi. Bul protsesterdi jáne birinshi kezekte, azamattar úshin aıtarlyqtaı ońaılatty.
«Sot aktilerin oryndaý júıesiniń damýyn tejeıtin basty faktor avtomattandyrýdyń jetkiliksizdigi bolyp tabylady. Kóptegen protsestik áreketter áli kúnge deıin qolmen jasalady, adam faktory bar. Formattyq-logıkalyq baqylaý fýnktsıonaly iske asyrylmaǵan kúıinde qalyp otyr, onyń mindeti sot oryndaýshylardyń zańsyz áreketterin buǵattaý bolýǵa tıis. Mysaly, aqparattyq júıe tyıym salýdy zańsyz alyp tastaýǵa múmkindik bermeý kerek. Sonymen qatar boryshkerdiń múliktik jaǵdaıyn avtomatty túrde tekserý jáne shekteý sharalaryn avtomatty túrde qoldanýy qajet. Sot oryndaýshylary tarapynan buzýshylyqtar týraly sıgnal beretin taldamalyq fýnktsıonal joq. Mysaly, atqarýshylyq qujattardy jappaı qaıtarý nemese is júrgizýdi qozǵaýdan bas tartý kezinde», - dedi Balaıym Kesebaeva.
