Kóptegen eldiń aldyn orap, Konstıtýtsııamyzǵa tuńǵysh ret tsıfrlyq quqyq máselesin engizdik — Aıdos Sarym

ASTANA. KAZINFORM — Konstıtýtsııaǵa tsıfrlyq quqyq máselesi engendikten barlyq kodeks pen zańdar ózgeredi. Bul týraly «Referendým-2026» onlaın marafony barysynda Májilis depýtaty Aıdos Sarym aıtty.

— Búginde adamnyń fızıkalyq ǵumyry bar, ıaǵnı kúndelikti kóshede júremiz, úıde bolamyz degen sııaqty. Bul — naqty fızıkalyq ómirimiz. Biraq, qarap otyrsańyzdar sonymen qatar Digital ómir paıda boldy. Bizdiń bilim alýymyz, ilim alýymyz, saýda jasaýymyz sol ortaǵa enip jatyr. Biz kóptegen eldiń aldyn orap, Konstıtýtsııamyzǵa tuńǵysh ret tsıfrlyq quqyq máselesin engizip otyrmyz. Osynyń aıasynda kóptegen kodekstiń, zańdardyń ózgeretindigi anyq. Bul úlken jańalyq, — dedi depýtaty.

Onyń aıtýynsha, Konstıtýtsııa qaǵıdat retinde bekitiledi.

— Konstıtýtsııanyń búkil babyna ózgeris endi. Osydan keıin jańa Quryltaı barlyq kodeksti, zańdardy qaıta jazyp shyǵady. Sol kezde bizdiń zańnama ózgeredi. «Konstıtýtsııa qabyldaýdyń sebebi ne?» dedińiz ǵoı. Biz bir dáýirdi aıaqtadyq. Ony postkeńestik kezeń dep aıtýǵa bolady. Jańa, shyn táýelsiz kezeńge aıaq bastyq. Sonymen qatar munaı dáýirin aıaqtadyq. Munaı tabý qala beretin shyǵar. Degenmen, Digital zamany keldi. Endi mundaıdyń energııasyna emes, adamnyń energııasyna negizdelgen ekonomıka kerek. Bizde shaǵyn jáne orta bıznestiń úlesi 40 paıyzǵa jetti. Bul úlken jetistik. Biraq, munan da artýy kerek. Sonda ǵana ekonomıkamyz da, memleket te qarapaıym halyqqa táýeldi bolady. Sol kezde ǵana bir-birimen astasyp, qoldap jatady. Konstıtýtsııanyń úlken bir ózgerisi buryn bir bapta «bıliktiń qaınar kózi — halyq» deıtinbiz. Endi egemendiktiń de qaınar kózi men qorǵany halyq deımiz. Demek, jaýapkershilikti bóletin, ortaq etetin dáýirge keldik, — dedi Aıdos Sarym.

Aıta keteıik, «Referendým–2026» onlaın marafony — bul jańa Konstıtýtsııa jobasyn túsindirýge arnalǵan aqparattyq alań.