Kóptegen elder balanyń jeke tólqujaty bolýyn talap etedi - ІІM
NUR-SULTAN. QazAqparat – Іshki ister mınıstrliginiń kóshi-qon komıteti kóptegen memleketter balada jeke tólqujat bolýyn talap etetinin málimdedi. Sondyqtan, shetelge shyǵar aldynda ár balada jeke qujatynyń bolýyn pysyqtap alý qajet, dep habarlaıdy QazAqparat vedomstvonyń baspasóz qyzmetine silteme jasap.
Elden tysqary shyqqan jaǵdaıda balalardyń sýretin ata-anasynyń pasportyna jelimdeýdi alyp tastaý boıynsha zańnamaǵa túzetý engiziledi. Balada jeke pasport bolýyn kóptegen elder talap etedi, osyǵan baılanysty komıtet aldaǵy ózgerister óte ózekti ekenin eske saldy.
«Qazir bul zań jobasy Parlament qaraýynda jatyr. Jeke pasport – kóptegen elderdiń talaby ekenin eskere otyryp, balalarymen shetelge shyǵýdy josparlaǵan ata-analarǵa basqa eldiń shekarasyn kesip ótý úshin erterek pasport rásimdeý kerektigi eskertildi. Sonymen qatar, bul túzetý Memleket basshysy zańǵa qol qoıǵannan keıin ǵana engiziletinin túsindirdik» delingen habarlamada.
Osyndaı túsindirmeler UQK Shekara qyzmetine jáne Syrtqy ister mınıstrligine joldandy.
HQO-da ata-analardyń pasportyna balasynyń sýretin jelimdeý máselesimen qabyldaý toqtatylǵan joq jáne sol qalypta júrgizilip jatyr.
«Ata-anasynyń pasportyna japsyrylǵan sýretpen kirgizetin jáne kirgizbeıtin memleketter týraly ádette Syrtqy ister mınıstrligi habardar etedi. Sondyqtan qandaı da bir elge jol júrer aldynda ol elge kirý tártibin dıplomatııalyq ókildikterden aldyn ala bilip alý kerek» deıdi komıtet.
Sondaı-aq, qazir ІІM balalarǵa tólqujat berý úshin memlekettik bajdy azaıtý máselesin pysyqtap jatyr.
