Kóptegen azamattyń moınynda birneshe nesıe bar ekeni jasyryn emes - Prezıdent
ASTANA. KAZINFORM — Kóptegen azamattyń moınynda birneshe nesıe bar ekeni jasyryn emes. Bul týraly Parlament palatalarynyń birlesken otyrysynda Qazaqstan halqyna Joldaýyn jarııalap jatqan Memleket basshysy Qasym-Jomart Toqaev aıtty.
«Barshańyzdy kezekti sessııanyń ashylýymen quttyqtaımyn! El ıgiligi úshin jasap jatqan qyzmetterińizge tabys tileımin. Ótken sessııada jemisti jumys júrgizildi. Atap aıtqanda, Parlamenttiń ekinshi sessııasynda 102 zań qabyldandy. Onyń ishinde qoǵamdyq baqylaýǵa, adam saýdasyna qarsy kúreske qatysty zańdar bar. Sondaı-aq ǵylym jáne tehnologııa saıasatyn, jylý energetıkasyn, basqa da máselelerdi retteıtin zańdar kúshine endi», - dedi Prezıdent.
Memleket basshysynyń atap ótýinshe, áleýmettik salaǵa, ásirese, balalardy qorǵaý isine aıryqsha kóńil bólindi. Ulttyq qordan balalardyń esepshotyna qarjy aýdarýǵa qatysty zań qabyldandy. Balalardy qumar oıynǵa tartqandar ákimshilik zań boıynsha jazaǵa tartylatyn boldy. Kámeletke tolmaǵan balalarǵa zorlyq-zombylyq kórsetkeni úshin beriletin jaza qataıdy. Balalardyń qaýipsizdigin qamtamasyz etýge, áıelder men balalarǵa qatysty qylmystyń aldyn alýǵa arnalǵan zań qabyldandy.
«Qazir kóptegen azamattyń moınynda birneshe nesıe bar ekeni jasyryn emes. Bul – óte ózekti másele, qoǵamdyq qater desek te bolady. Sondyqtan osy baǵytta arnaıy zańdar qabyldandy. Halyqtyń ál-aýqatyn jaqsartýǵa septigi tıetin basqa da kóptegen shara qolǵa alyndy. Sizder bul jumyspen tikeleı aınalysyp, halyqpen árdaıym tyǵyz baılanysta boldyńyzdar. Munyń bári «Halyq únine qulaq asatyn memleket» qaǵıdasyn ornyqtyrýǵa yqpal etetini sózsiz. Tabandy eńbekterińiz úshin barshańyzǵa rızashylyǵymdy bildiremin. Degenmen, arqany keńge salýǵa bolmaıdy. Áli de atqaratyn sharýa kóp», - dedi Qasym-Jomart Toqaev.
