Kóptegen adamnyń ómirin saqtap qalýǵa bolady – mınıstr elordadaǵy jańa gospıtal jóninde

NUR-SULTAN. QazAqparat – QR Densaýlyq saqtaý mınıstri Eljan Birtanov koronavırýske shaldyqqan naýqastardy emdeý úshin Nur-Sultan qalasynda salynǵan jańa aýrýhanaǵa qatysty pikir bildirdi, dep habarlaıdy QazAqparat.

«Bul, shynymen de, qajetti jáne biregeı aýrýhana. Koronavırýs pandemııasy kezinde munda kóptegen adamnyń ómirin saqtap qalýǵa bolatynyna senimdimin. Tipti odan keıin de (pandemııa – red.) elorda medıtsınasyna qyzmet ete bermek.

Álem boıynsha kóptegen tamasha aýrýhanalarda boldym. Biraq ózimizdiń qazaqstandyq qurylysshylarymyz aýrýhanalardy: jyldam, sapaly ári halyqaralyq tehnologııalar boıynsha salatynyn alǵash ret óz kózimmen kórdim jáne sendim. Medıtsına qyzmetkerlerin quttyqtaımyn jáne bul teńdessiz jobaǵa atsalysqan barshańyzǵa alǵys bildiremin!», - dep jazdy mınıstr Facebook-te.

Eske salaıyq, Densaýlyq saqtaý mınıstrliginiń usynysymen Nur-Sultan, Almaty jáne Shymkent qalalarynda kronavırýs ınfektsııasyn juqtyrǵan naýqastardy emdeıtin jańa gospıtaldar salý sheshildi.

Nur-Sultan qalasynda zamanaýı juqpaly aýrýlar aýrýhanasy 13 kúnde turǵyzyldy. Ol 200 orynǵa arnalǵan. Ǵımarat ModeX zaýytynda nemis tehnologııasymen ázirlengen bloktardan qurastyryldy. Aýrýhana palatalarynda arnaıy gospıtaldik jeldetkishter bar. Bul, qyzmetkerlerdiń ınfektsııa juqtyrý qaýpin azaıtady. Odan bólek, aýany súzgiden ótkizetin júıe ornatylǵan. Esik pen terezeden aýa ótpeıdi. Ár palatada jeke dárethana qarastyrylǵan. Joba dırektory Arman Lesbekovtiń aıtýynsha, qurylysta Dúnıejúzilik densaýlyq saqtaý uıymynyń barlyq talaby eskerilgen.

Aıta keteıik, 21 sáýir saǵat 22.35-tegi sońǵy málimet boıynsha, Qazaqstanda koronavırýsqa shaldyqqandar sany 1995 adamǵa jetti. Іndetten 489 adam jazyldy, qaıtys boldy – 19 adam.