Kópshiligi úshin bul bızneske aınaldy: Erlan Qarın sheteldik grant alýshylar týraly

ASTANA. KAZINFORM - QR Memlekettik keńesshisi Erlan Qarın sheteldik kózderden qarjy alatyn úkimettik emes uıymdar men azamattyq belsendiler qyzmeti týraly pikirin bildirdi. 

— Mundaı uıymdar men adamdar óte kóp, olar qandaı da bir jaǵdaıǵa nemese máselege «jabysyp», paıda kórýge tyrysady. Qyzyǵy sol, olar tipti bul problemalardyń sheshilmeýine kóbirek múddeli bolýy múmkin. Óıtkeni bul olarǵa materıaldyq ári psıhologııalyq turǵydan tıimdi, - dedi Erlan Qarın Qogam News YouTube-arnasynda jýrnalıst Dınara Sátjan men saıası sholýshy Ádil Seıfýllınmen suhbatta. 

Onyń aıtýynsha, mundaı belsendiler men ÚEU ókilderi Qazaqstandaǵy oń ózgerister týraly habar taratýǵa asa múddeli emes.

— Olar únemi tek jaǵymsyz esepter jiberedi. Sebebi oń ózgerister bolsa, sóz bostandyǵy, demokratııa deńgeıi, adam quqyqtarynyń saqtalýy boıynsha reıtıngterde elimizdiń orny ózgeredi. Bul jaǵdaıda olardy qarjylandyrý toqtaýy múmkin. Sondyqtan kópshiligi úshin bul – bıznes, - dep túsindirdi E. Qarın.

Buǵan deıin Qazaqstanda sheteldik agentter týraly zań qabyldaý usynyldy. Onda depýtat Irına Smırnova Qazaqstanda shamamen 200 ÚEU shetelden qarjylandyrylatynyn, olardyń 70%-y ártúrli kózder arqyly AQSh-tan qarjylandyrylǵanyn málimdegen bolatyn.