Kópshilik nazaryna alashtyqtardyń buryn-sońdy jarııalanbaǵan fotosýretter jınaǵy usynyldy
ASTANA. 3 qazan. QazAqparat - Búgin Astanada «Alashorda» atty fotoalbomnyń tusaýkeser rásimi ótti.
Atalmysh jınaq Alashorda qozǵalysynyń 95 jyldyq mereıtoıyna arnalyp otyr. Jınaq Alash qozǵalysynyń qalyptasý, saıası sahnaǵa shyǵý, Alash avtonomııasyn qurý, Keńestik dáýirdegi qýǵyn-súrgin kezeńderiniń sýretterin qamtıdy. Onda engen 350-den astam fotosýretter taqyryptyq-hronologııalyq júıe negizinde mazmuny men túsý kezeńderine qaraı qaraı 6 bólimge toptastyrylǵan. Jınaqtyń «Atqan tań» atty alǵashqy bóliminde Alash qaıratkerleriniń gımnazııa men ýnıversıtettegi jyldarynyń estelik-fotolary engen. «Oıan, qazaq!» - ult-azattyq qozǵalysynyń qalyptasý kezeńiniń sýretterin qamtıdy. «Alash avtonomııasy» bólimi Alashorda úkimetiniń 15 múshesiniń fotosýretterimen bastalyp, 1917-20 jyldardaǵy sýretter shejiresin jasaýǵa negizdelgen. «Sovettik taǵdyrlar» jáne «Abaqty joly» atty taraýlar Alash ardaqtylarynyń Keńestik dáýirdegi qyzmeti men qýǵyn-súrgin dáýiri sýretterinen quralsa, «Taǵzym» atty bólimge táýelsizdik jyldarynda Qazaqstannyń ár túkpirinde Alash qaıratkerlerine ornatylǵan eskertkishter toptastyrylǵan.
Albomǵa engen sýretter Alash qaıratkerleriniń urpaqtary men ǵalymdardyń qolyndaǵy jeke qorlardan, ádebıetter men muraǵattardan alynǵan.
Alaıda, jınaq avtory Bolat Múrsálimniń aıtýynsha, kóptegen materıaldarǵa qol jetken joq. Sebebi Reseı muraǵattaryndaǵy qujattardy alý múmkin emes bolǵan.
«Áli de bolsa, kóptegen muraǵattarda, ásirese Reseı muraǵattarynda mundaı sýretterdiń kóp ekendiginde daý joq. Bul aldaǵy bolashaqtyń isi. Degenmen Alash qaıratkerleriniń Reseı memlekettik Dýmasyna depýtat bolǵan kezderindegi birneshe sýretteri osy albomda tuńǵysh ret jarııalanyp otyr. Kópshilikke usynylmaǵan osyndaı fotolar barshylyq», - deıdi B. Múrsálim.
